Неодамнешната студија објавена во списанието „Neurology“ сугерира дека усвојувањето на седум здрави животни навики може да го намали ризикот од развој на деменција, дури и кај луѓе со генетска предиспозиција за Алцхајмерова болест. Истражувачите следеле повеќе од 11.000 лица во текот на 30 години, анализирајќи го влијанието на овие навики врз појавата на деменцијата. На учесниците им била доделена оценка за кардиоваскуларното здравје (CVH) врз основа на „Simple 7“ или седум здрави навики на Американската асоцијација за срце, кои вклучуваат:

• Здрава исхрана;

• Редовна физичка активност;

• Одржување здрава телесна тежина;

• Неконсумација на тутун;

• Контрола на крвниот притисок;

• Регулација на холестеролот;

• Регулирање на нивото на шеќер во крвта.

Во 2022 година, „AHA“ ја прошири оваа листа на „Life’s Essential 8“ со додавање на квалитетниот сон како клучен фактор.

Анализата покажала дека испитаниците со подобро кардиоваскуларно здравје имале пониски нивоа на биомаркерот неврофиламент (NfL), кој е поврзан со невродегенеративни болести како што се Алцхајмеровата и Паркинсоновата болест. Учесниците со највисоки резултати за кардиоваскуларното здравје (10-14 поени) имале 19 проценти пониски нивоа на NfL во крвта во споредба со оние со најниски резултати (0-6 поени).

Што значи ова за секојдневниот живот?

Резултатите од истражувањето уште еднаш потврдуваат дека здравите навики можат да играат клучна улога во зачувувањето на когнитивната функција. Балансираната исхрана, редовното вежбање, одржувањето на здрава тежина, непушењето и контролирањето на крвниот притисок, шеќерот и холестеролот може да го намалат ризикот од невродегенеративни болести.

Покрај тоа, помалку стрес, доволно квалитетен сон, а всушност дружењето и поврзувањето исто така може да придонесат за одржување на здравјето на мозокот. Иако генетиката игра одредена улога, животните навики остануваат моќна алатка во спречувањето на деменцијата.