"BYD" го зацврсти својот статус како водечки светски производител на електрични возила (EV) второ тримесечје по ред, менувајќи ја динамиката на глобалниот пазар и ставајќи ја доминацијата на "Tesla" под знак прашање.

Најновите податоци за продажба и прогнозите на глобалната компанија за истражување на пазарот "Counterpoint Research" покажуваат дека овој тренд ќе продолжи до крајот на 2025 година.

"BYD" ја зголемува предноста пред "Tesla"

Во првото тримесечје од 2025 година, "BYD" испорача 416.388 батериски електрични возила (BEV), надминувајќи ги 336.681 возила на "Tesla". Ова следи по значајниот успех на "BYD" во четвртиот квартал од 2024 година, кога продаде 595.413 BEV-возила, во споредба со 495.570 на "Tesla".

Сепак, гледано на годишно ниво, "Tesla" сè уште имаше мала предност во 2024 година, со продадени 1.789.226 возила, наспроти 1.764.992 на "BYD".

Но, прогнозите покажуваат дека во 2025 година, "BYD" за првпат ќе ја престигне "Tesla" како водечки светски бренд за батериски електрични возила, освојувајќи 15,7% од глобалниот пазар.

Оваа пресвртница се должи на агресивната експанзија на "BYD", која е овозможена благодарение на неговото технолошко водство, вертикално интегриран производствен модел и силната поддршка од кинеската влада, се наведува во Глобалната прогноза за патнички електрични возила на "Counterpoint Research".

Технолошка предност на "BYD": Брзо полнење како клучен фактор

Клучниот адут на "BYD" е ултра-брзиот систем за полнење, кој работи на 1000 V архитектура, користи батерии со 10 ќелии и сопствена "Blade Battery" технологија.

Овој систем овозможува 400 км досег за само 5 минути, поставувајќи нов индустриски стандард. Ова е значително побрзо од "Tesla Supercharger", кој додава околу 275 км во 10 минути, вели истражувачкиот аналитичар на "Counterpoint", Абик Мукерџи.

Во меѓувреме, "Tesla" се соочува со пад на продажбата во САД и Европа, делумно поради поларизирачките политички ставови на Илон Маск и растечките геополитички тензии.

„Ова е огромна можност за "BYD". Ако успеат да го реализираат ветувањето за ултра-брзо полнење, тоа би можело да биде клучниот момент на пресврт“, вели Лиз Ли од "Counterpoint Research".