Третата епизода од серијата „Адолесценција“ содржи два значајни пропусти што професионален психолог никогаш не би си ги дозволил, вели д-р Шејла Редферн, консултантски клинички психолог со повеќе од 30 години искуство, пренесува DailyMail.

Во епизодата, обвинетиот Џејми Милер е на евалуација кај психологот Бриони Аристон. Д-р Редферн укажува на две клучни грешки во постапките на Бриони кои би можеле да имаат сериозни последици во реален контекст.

1. Носење топол пијалок на агресивен тинејџер

Во сцената, Бриони му носи на Џејми сендвич и чаша топло чоколадо, што е честа практика за создавање поопуштена атмосфера. Меѓутоа, д-р Редферн нагласува дека ова е неприфатливо во случај со насилно дете.

„Кога работите со тинејџер со докажано агресивно однесување, носењето топол пијалок е сериозен ризик. Во епизодата, токму тоа се случува – Џејми ја фрла чашата во напад на бес. Ова е пример како наизглед безопасен потег може да резултира со сериозна последица“, вели таа.

2. Оставање на важно прашање без одговор

Во една од најнапнатите сцени, Џејми ѝ поставува лично прашање на Бриони – дали му се допаѓа. Наместо да одговори, таа останува воздржана, што според д-р Редферн е проблематично.

„Професионалното дистанцирање е важно, но во реалноста, психолог не би го игнорирал ваквото прашање. Ако му каже дека му се допаѓа, тоа би било несоодветно. Но, ако го остави да мисли дека никој не може да го засака, тоа би можело да ја зацврсти неговата перцепција дека е одбивен и опасен, што дополнително би ги усложнило неговите психолошки проблеми“, објаснува Редферн.

Иако сцената е драматично ефективна, таа не ја одразува реалната практика на клиничките психолози. Според експертите, овие пропусти не само што ја нарушуваат автентичноста на серијата, туку и создаваат погрешна слика за тоа како се одвиваат психолошките проценки во случаи на насилно однесување.