По успешната прва сезона, серијата „Елсбет“ се враќа на каналот Стар Лајф на 24 март со нови интригантни случаи кои дополнително ќе ја збогатат приказната.
Кери Престон ја повторува својата улога како Елсбет Тасиони, неконвенционална адвокатка со уникатен пристап во решавањето на злосторствата, која сега тесно соработува со полицискиот оддел во Њујорк.
Во новите 17 епизоди, кои ќе бидат прикажани секој понеделник во 22 часот, Елсбет продолжува да практикува непредвидливи, но генијални методи за решавање случаи, носејќи неочекувани пресврти. Од елитни оперски кутиии и вселенски прошетки до хаотични кујни во ресторани, секое злосторство носи мистерија која само таа може да ја разоткрие. Во интервјуто за ТВ Екран, Кери открива како се чувствува кога ја игра Елсбет и како таа лично се поврзува со овој лик.
Што може да очекува публиката од втората сезона на серијата „Елсбет“?
Многу работи (смеа)! Ако мислевте дека сте ја виделе сета Елсбет, подгответе се за нови изненадувања. Оваа сезона таа е уште повеќе во својот елемент, а Њујорк и дава дополнителна сила и простор да покаже колку е интелигентна и неконвенционална. Ќе има непредвидливи пресврти, многу динамика и неколку случаи кои беа фасцинантни за време на снимањето.
Елсбет е специфичен лик, наивен, но брилијантен. Како би го опишале?
Таа е слободен дух. Нејзината непредвидливост е нејзината сила. Се чини дека секогаш не е во контакт со ситуацијата, но тоа е само маска. Таа всушност забележува работи кои другите не ги гледаат. Нејзината уникатност лежи во способноста да размислува надвор од рамките и да го користи инстинктот на начин на кој не го прават другите ликови во серијата.
Како Њујорк ја промени вашата хероина?
Во „Добрата сопруга“ и „Добрата борба“ повеќе беше гостински лик, но сега, во својата сопствена серија, е целосно развиена. Њујорк и дава дополнителна доза на храброст и дрскост. Тоа е град во кој треба да бидеш брз, приспособлив и снаодлив — сè што веќе е присутно, но сега тие доблести се уште поочигледни.
Колку вие лично се препознавате себеси во Елсбет?
Повеќе отколку што очекував (се смее). Со неа ја споделувам љубопитноста и потребата постојано да ги набљудувам луѓето и да анализирам што ги поттикнува. Се разбира, таа е попаметна од мене во сето ова, но сакам како што таа е секогаш чекор напред.
Кои моменти од снимањето на втората сезона беа најпредизвикувачки за вас?
Сцени во кои Елсбет треба да се соочи со сериозни препреки, но на свој начин — без агресија или форсирање, туку со своја уникатна логика. Исто така, има неколку емотивни сцени во оваа сезона кои беа многу напорни за мене, но нема да откријам премногу. Елсбет е како магична капа. Никогаш не знаете дали од неа ќе излезе зајак или локомотива, но сигурно ќе ве остави без здив секој пат.
Што ви носи инспирација во животот, работата и во оваа серија?
Луѓето. Ги набљудувам, слушам приказни и фаќам мали детали што ме фасцинираат. Инспирацијата ја наоѓам во оние парчиња од сложувалката кои не се вклопуваат лесно, кои се некако надвор од системот. Можеби затоа многу ми се допаѓа Елсбет. Таа не игра според правилата, но сепак е најдобра во тоа што го прави.
Бевте дел од големи проекти. На што се сеќавате од почетокот на кариерата?
Тоа чувство кога за прв пат ќе застанеш пред камера и ќе сфатиш дека тоа е она што сакаше да го правиш до крајот на животот. Се сеќавам како еднаш на снимањето поминав часови вежбајќи само една сцена, и бев исцрпена, но мислев дека тоа е најдобрата работа на светот.
Дали имате животна филозофија?
Слушајте ги вашите инстинкти и не плашете се да бидете свои. Играјте, истражувајте, бидете љубопитни. Тоа е нешто што го прави и Елсбет, и затоа е толку посебна.
