Бран на насилство насочен кон "Tesla"

"Tesla" возилата станаа мета на напади во повеќе американски градови, привлекувајќи големо внимание во јавноста и властите. Во Лас Вегас, на 17 март, непознат сторител запали пет "Tesla" автомобили паркирани пред изложбениот салон во округот Кларк. Пожарот бил предизвикан со Молотови коктели, а на местото на настанот била оставена порака испишана со спреј: „F*ck Elon“.

Сигурносните камери снимиле маскиран напаѓач кој околу 2:45 часот наутро ги подметнува пожарите, а пламенот ги зафатил возилата, но не предизвикал експлозија на батериите. Американското ФБИ се вклучи во истрагата, испитувајќи го случајот како можен акт на „домашен тероризам“.

Истата ноќ, во Канзас Сити, биле запалени два "Tesla Cybertruck", додека во Јужна Каролина непознат сторител се обидел да запали "Tesla" станица за полнење, но неуспешно – неговата облека се запалила и тој побегнал.

Во Колорадо, 40-годишната Луси Грејс Нелсон беше уапсена под обвинение за повеќе напади врз "Tesla" салонот во Лавленд – фрлање Молотови коктели и пишување пораки како „F*ck Musk“ и „Nazi“.

Слични напади беа пријавени и во Орегон, Масачусетс и Мериленд, каде што "Tesla" возила и станици за полнење беа мета на палежи, пукање и графити со пораки како „Resist“ (Отпор).

Насилството не е ограничено само на САД. Во Берлин, на 14 март 2025, запалени беа четири "Tesla" автомобили на различни локации, а германската полиција не ја исклучува можноста за политички мотив. Сличен инцидент се случи и во Тулуз, Франција, на 2 март 2025, кога дванаесет "Tesla" возила беа уништени во пожар, а обвинителите тврдат дека не станува збор за случајност.

NEW VIDEO: LVMPD Investigating Arson & Vandalism at Tesla Facility

At approximately 2:45 AM, LVMPD received multiple 911 calls reporting vehicles on fire at a Tesla collision and sales center near the 6200 block of Badura. Witnesses reported seeing a suspect in black clothing… pic.twitter.com/GDIuMhsfjg

— LVMPD (@LVMPD) March 18, 2025

Маск во центарот на вниманието

Овие напади се случуваат во период кога Маск е во политичка бура поради неговата поврзаност со администрацијата на Доналд Трамп, каде што ја води Агенцијата за ефикасност на владата (DOGE). Многумина сметаат дека ова е вистинската позадина на насилството, иако истрагите сè уште не утврдиле конкретни мотиви.

По последниот бран на напади, Маск, кој е познат по својата активност на платформата X (поранешен Twitter), жестоко реагираше. Во низа објави, тој изрази фрустрација и осуди го насилството.

„Моите компании создаваат одлични производи што луѓето ги сакаат, а јас никогаш никого не сум повредил. Тогаш зошто оваа омраза и насилство против мене? Затоа што сум смртоносна закана за ’woke‘ паразитот и луѓето што тој ги контролира“, напиша Маск.

Во друга објава, додека споделуваше видео од запалените автомобили во Лас Вегас, тој напиша:

„Ова насилство е изопачено и длабоко погрешно. "Tesla"само произведува електрични возила и не направила ништо за да ги заслужи овие злобни напади.“

Во уште еден твит, Маск ги нарече нападите „тероризам“ и додаде:

„Нивото на насилство е неверојатно и целосно неоправдано.“

Неговите коментари сугерираат дека тој гледа на нападите како политички мотивирани, поврзани со неговата поврзаност со Трамп и конфликтот со ’woke‘ идеологијата.

Широката слика и последиците за "Tesla"

Нападите врз "Tesla" ескалираа по инаугурацијата на Трамп во јануари 2025, кога Маск стана негов клучен советник. Неговата поддршка за контроверзните политики, како што се масовните отпуштања на федерални работници, предизвика протести низ целата земја. Додека дел од демонстрациите беа мирни, како „Tesla Takedown“ протестите во Њујорк и Пасадена, некои прераснаа во насилство што ги погоди возилата и инфраструктурата на компанијата.

За "Tesla", како лидер во индустријата на електрични возила, овие инциденти претставуваат сериозен предизвик. Вредноста на акциите падна за речиси 48% оваа година, не само поради економските услови, туку и поради негативниот публицитет што ѝ штети на репутацијата на компанијата.

Уништувањето на "Cybertruck" возилата, "Model 3" и станиците за полнење низ целиот свет создава сериозни проблеми за брендот, а потенцијалните купувачи сè почесто ја преиспитуваат "Tesla" како компанија.

Tesla веќе имаше големи проблеми во Европа – според извештаите, продажбата во Европа паднала за 45% во првите месеци од 2025.

Минатата недела Трамп купи "Tesla" како знак на поддршка за Маск, но тоа не ги спречи нападите, ниту ја подобри перцепцијата кај љубителите на автомобили.

Додека истрагите за палежите продолжуваат, Маск и "Tesla" сега се прашуваат дали нападите ќе престанат или ќе продолжат. Ако оваа ситуација ескалира, компанијата би можела да биде принудена да засили безбедноста во своите салони и станици за полнење, што би донело дополнителни трошоци и компликации.

Клучното прашање е каква иднина ја чека "Tesla" во овие турбулентни времиња. Одговорот на тоа прашање ќе го дознаеме во месеците што следуваат.