Поранешната австралиска тенисерка Рене Стабс жестоко го критикуваше Новак Ѓоковиќ по неговиот единствен пораз во Доха, повикувајќи на негово неизбежно пензионирање.
Српскиот тенисер сè уште ја бара својата препознатлива форма по повредата на Австралија опен. Иако не изгледаше целосно подготвен на турнирот во Доха, јасно е дека ја „темпира“ својата игра за поважните натпревари. Сепак, секој негов пораз веднаш станува повод за некои да го „испратат“ во пензија.
Овој наратив трае веќе со години, но за разлика од неговите најголеми ривали, Роџер Федерер и Рафаел Надал, Ѓоковиќ и натаму успева да се носи со многу помлади противници, без никакви знаци дека планира да се повлече. Напротив, обидите да го „притиснат“ кон пензионирање само дополнително го мотивираат.
Најновата во низата такви критики дојде од Рене Стабс, која веќе е позната по своите негативни изјави за Ѓоковиќ. По турнирот во Доха, таа изјави дека српскиот ас покажува знаци на „стареење“ и дека неговиот пораз од Матео Беретини е загрижувачки.
„Новак загуби од Беретини. Тој се врати подобро од сите, но сега повредите почнуваат да му создаваат проблеми, наместо да му овозможуваат победи“, изјави Стабс.
Поранешната тенисерка, која своевремено беше најдобра во светот во двојки, го спореди Ѓоковиќ со сопственото искуство, но притоа не сфати дека нивните ситуации се сосема различни:
„Кога не играш подолго време, се враќаш постар. Кога ќе излезеш на терен, се туркаш повеќе, работиш понапорно, стануваш понервозен... Тоа се гледа“, додаде таа.
Во подкаст-разговор со Кејтлин Томпсон, Стабс отиде и чекор подалеку, обвинувајќи го Ѓоковиќ дека има „синдром на жртва, како и сите Срби“. Таа исто така тврди дека е „опседнат со рекорди“ и дека сака да биде попопуларен од Федерер и Надал.
„Ѓоковиќ е многу поларизирачка фигура на многу начини – за многу луѓе, но и за мене како поранешна професионалка и некој што ја следи оваа борба долго време. Сепак, мора да му се восхитувате на неговата упорност. Тој никогаш не се откажува и е немилосрден. Роџер и Рафа ја создадоа таа силна желба за победа, но Новак стана опседнат со тоа“, изјави таа во интервју за BBC.
