Во "Bugatti" повторно поставуваат нов екстрем во својата понуда. Ако мислевте дека "La Voiture Noire" беше врвот на понудата, делумно сте во право. Овој некогаш најскап нов автомобил беше екстремен во секој поглед, а тоа го покажуваше и страшниот заден дел, каде што имаше шест издувни цевки – вистинска реткост кај сериските автомобили.

Но, новиот "Tourbillon" изгледа ќе започне ново поглавје.

"Equipe Pur Sang" – ново поглавје за "Bugatti Tourbillon"

Според објавите на "@bugattitourbillon.registry", "Bugatti" подготвува специјален пакет наречен "Equipe Pur Sang", кој ќе му овозможи на сопственикот модифициран издувен систем.

Во основната верзија "Tourbillon" има двоен издув, но со "Equipe Pur Sang" пакетот ќе добие четири цевки од секоја страна, односно вкупно осум издувни цевки – вистински спектакл.

Но, овој пакет не вклучува само нов издувен систем. Автомобилот ќе добие и:

• преработен преден браник

• редизајниран дифузер во задниот дел

• дополнителни аеродинамични елементи

• ексклузивни детали во кабината

Со овој пакет, "Bugatti" уште еднаш ја нагласува ексклузивноста и престижот на своите модели.

Цена што ги поместува границите

Иако основниот "Tourbillon" започнува со цена од 3.8 милиони евра, можеби ќе ве изненади цената на овој ексклузивен пакет.

Верувале или не, пакетот "Equipe Pur Sang" чини речиси 240.000 евра – сума за која може да се купи сосема пристоен суперспортски автомобил.

Да потсетиме, "Bugatti" планира само 250 примероци од "Tourbillon", моделот што го заменува легендарниот "Chiron".

:Bugatti: уште еднаш докажува дека луксузот и екстремноста немаат граници.