Останките доаѓаат од втората фаза на ракетата „Falcon 9“, која била лансирана на 1 февруари од „Vandenberg Space Force“ во Калифорнија, носејќи нов сет на сателити Старлинк. Втората фаза на ракетата, тешка околу четири тони, не успеала да ја изврши планираната деорбита, што резултирало со нејзино неконтролирано повторно влегување во атмосферата над Полска помеѓу 4:46 и 4:48 часот наутро по локално време.

Сведоци од Велика Британија, Холандија, Германија, Данска и Полска изјавија дека виделе светли огнени топки кои полека се распаѓале на небото, а многумина споделија снимки на социјалните мрежи.

На социјалната мрежа Х беше објавена и снимка од надзорна камера, на која изгледа се гледа моментот кога паднал дел од „Falcon 9“.

Пронајдени неколку ракетни делови во западна Полска

Во складиштето Адам Боруцки во Коморники, во близина на Познањ, откриен е голем објект „сличен на резервоар“ (димензии приближно 1,5 × 1 м). Втор идентичен резервоар пронајден е во шумата кај селото Вири, на околу 30 километри.

Дополнителни фрагменти се пронајдени во градовите Шливно и Самотули, северозападно од Познањ.

Експертите ги идентификуваа објектите како композитни садови под притисок (COPV) од горната фаза на Фалкон 9. Астрономот од Харвард, Џонатан Мекдауел, потврди дека пронајдениот сад „има правилна големина и форма како садовите COPV што се користат во горната фаза на Фалкон 9“.

„Space X“ го потврди случувањето

Полските власти, вклучително и полицијата и пожарникарите, ги обезбедија локациите каде што биле пронајдени останките, додека Полската вселенска агенција (ПОЛСА) соработувала со SpaceX за да го потврди потеклото на деловите и да ги испланира следните чекори.

„Останките не се токсични, но не ги допирајте“

„SpaceX“ потврди во официјалното соопштение дека втората фаза од ракетата од мисијата од 1 февруари повторно влегла во атмосферата над Европа и дека тие „тесно соработуваат со полската влада на операциите за обновување и чистење“.

Компанијата исто така нагласи дека „остатоците не содржат токсични материјали“, но ги советуваа граѓаните да не ги допираат пронајдените делови, туку да ги пријават на локалните власти или на официјалната линија за пријава за вселенски отпад на „SpaceX“.

ПОЛСА предупреди дека дополнителни ракетни остатоци може да се распрснуваат во радиус од 100 километри, протегајќи се низ поголем дел од Полска.