Производителите на автомобили "Tesla", "BMW" и кинеските "SAIC", "Geely" и "BYD" ги оспоруваат дополнителните царини на ЕУ за увоз на електрични автомобили произведени во Кина со поднесување тужба до Европскиот суд на правдата.
Од крајот на октомври, Европската комисија, покрај тарифата од 10 отсто, воведува дополнителна царина до 35 отсто за автомобилите од кинеско производство на батерии. Кина се пожали на Светската трговска организација (СТО) поради одлуката, која ја смета за протекционистичка. Покрај тоа, таа започна антидампинг истраги за увоз на свинско месо, млечни производи и алкохолни пијалаци од ЕУ.
ЕУ вели дека со дополнителната тарифа сака да воспостави услови за фер конкуренција со производителите од Кина, за кои вели дека имаат корист од кинеските државни субвенции, за да ја одбрани европската автомобилска индустрија, која вработува 14 милиони луѓе, од ваквата практика на Кина.
Царините на ЕУ се последица на порадикални мерки на САД – царина од 100 отсто за сите електрични автомобили увезени од Кина. Водечките германски производители, вклучувајќи го и "BMW", произведуваат многу модели во Кина, од кои некои ги увезуваат во ЕУ. Американскиот производител "Tesla" го произведува својот успешен „Model 3“ во Шангај и го извезува во Европа.
Нивото на европските тарифи варира во зависност од проценетиот процент на субвенции што производителите ги добивале во Кина: од 7,8 проценти за возилата на "Tesla" произведени во Шангај, над 17 проценти за "BYD", 18,8 проценти за "Geely" и 35,3 проценти за возилата на компанијата "SAIC".
Пазарниот удел на кинеските електрични автомобили во ЕУ скокна од помалку од два отсто во 2020 година на повеќе од 14 отсто во вториот квартал од минатата година, соопшти ЕУ.
