На 29-годишна возраст, Рос Улбрихт пред една деценија беше осуден на две доживотни затворски казни, плус дополнителни 40 години, без можност за условно ослободување.
Сепак, неодамна, Доналд Трамп, новиот американски претседател, го помилува и му ја врати слободата.
Во 2011 година, на само 26 години, Улбрихт ја отвори веб-страницата Silk Road, платформа која користеше темна мрежа (darknet) за онлајн трговија. Целта му беше да создаде пазар кој функционира надвор од владината контрола, водејќи се од слободарски идеали. Основните правила на платформата беа едноставни:
• Забрана за насилство,
• Забрана за продажба на украден имот,
• Забрана за штета врз трети лица,
• Плаќање исклучиво со Bitcoin.
Но, платформата брзо излезе од контрола и стана популарна меѓу оние кои тргуваа со нелегални супстанци, оружје и други забранети стоки. Иако „Silk Road“ беше првата голема платформа што користеше Биткоин и воведе системи за дигитална доверба, таа го привлече вниманието на американските федерални власти.
Fk yes!!! Am so happy for Ross and his family, such a long time coming ! https://t.co/GckB0HU3ln
— George ☀️ Step Finance (@George_harrap) January 22, 2025
Во октомври 2013 година, ФБИ го уапси Улбрихт во библиотека во Сан Франциско. Доказите од неговиот лаптоп, кој бил најавен во административниот панел на Silk Road, беа клучни за судењето. Улбрихт беше осуден на доживотен затвор, иако тоа беше негово прво кривично дело, без употреба на насилство.
За разлика од Улбрихт, дилерите на дрога кои ја користеле страницата добија 10-годишни казни, администраторите 8 месеци, а другите обвинети во просек добиваа од две до пет години затвор. Оваа огромна разлика во казните покрена многу прашања, особено околу мотивите на властите. Некои веруваат дека строгата казна беше обид да се спречи ширењето на криптовалутите како алтернатива на владината контрола.
Во текот на издржувањето на казната, Улбрихт мина четири месеци во самица и им одржуваше часови по медитација на затворениците. И покрај затворските услови, неговото влијание врз светот на криптовалутите остана огромно. Тој ја докажа практичната примена на Биткоин, го поттикна неговото рано прифаќање и ја постави основата за модерните платформи за крипто тргување.
На 21 јануари, Доналд Трамп потпиша безусловно помилување за Рос Улбрихт, истакнувајќи дека разговарал со неговата мајка и ѝ се заблагодарил за поддршката за време на изборната кампања. Трамп изјави:
„Со задоволство го потпишав помилувањето за Рос. Оние кои го осудија се истите луѓе што ја злоупотребуваат моќта против мене.“
Иновациите често се раѓаат во сивите зони, а Биткоин не е исклучок. Улбрихт, за некои борец за дигитална слобода, за други предупредување за опасностите од неконтролирана технологија, останува контроверзен лик. Помилувањето од Доналд Трамп е последното поглавје во оваа приказна, кое ќе продолжи да ја инспирира дебатата околу слободата, технологијата и границите на владината контрола.
