Рекордната топлина на океаните зема катастрофален данок од едно од најголемите природни чуда во светот, при што избелувањето на коралите на Големиот корален гребен во Австралија достигна „катастрофално“ ниво, покажа новото истражување.
Повеќе од 50 отсто од погодените корали набљудувани во близина на островите на југот на гребенот беа убиени минатата година за време на најтешкото и најраспространето избелување кое некогаш ја погодило областа, тврди тим од австралиски научници.
Во 2024 година, гребенот го доживеа најлошото лето во историјата. Високите температури на океаните соборија рекорди, предизвикувајќи седмо масовно избелување на гребенот. Коралите се избелуваат во бела боја кога морските топлотни бранови, ги ставаат под стрес, предизвикувајќи ги да ги исфрлат алгите од нивното ткиво, извлекувајќи им ја бојата.
Виновникот е согорувањето на фосилните горива кои ја загреваат планетата, што ги зголемува глобалните температури. Оштетувањето на коралите исто така се забрза минатата година поради временските прилики Ел Нињо, кои ги зголемуваат температурите на океаните во овој дел од светот, пренесе Си-ен-ен.
Научниците од Универзитетот во Сиднеј следеа 462 корални колонии на островот „One Tree“ во текот на пет месеци минатата година, почнувајќи од врвот на топлотниот бран на почетокот од февруари.
До мај, 370 од тие колонии беа избелени, а до јули 52 отсто од избелените корали угинаа, според рецензираната студија објавена во „Limnology and Oceanography Letters“.
Некои видови корали кои беа набљудувани имаа стапка на смртност од 95 отсто, а истражувачите го забележаа почетокот на „колапсот на колонијата“.
Друг вид, Гониопора, е заразен со болеста црна лента, која го напаѓа коралното ткиво и може да го убие.
„Нашите наоди ја истакнуваат итната потреба за акција за заштита на коралните гребени, кои не само што се жаришта на биолошката разновидност, туку се и клучни за безбедноста на храната и заштитата на крајбрежјето“, рече главната авторка на истражувањето Марија Бирн, од Училиштето за живот и животна средина на универзитетот.
Бирн рече дека проучената област се наоѓа во заштитниот дел од гребенот, далеку од брегот и без рударски активности и туризам.
Но, гребенот, „и покрај неговиот заштитен статус, не беше имун на екстремниот топлотен стрес кој го предизвика овој катастрофален настан на избелување“, рече таа.
Со површина од речиси 345.000 квадратни километри, Големиот корален гребен е најголемиот корален гребен во светот, дом на повеќе од 1.500 видови риби и 411 видови тврди корали. Секоја година придонесува со милијарди долари за австралиската економија, главно преку туризмот, и е силно промовиран пред странските посетители како едно од најголемите природни чуда во земјата, но и во светот.
