Во процесот на претворање на "Gladiator" во верзија 6×6, "Apocalypse Manufacturing" додава трета осовина и монтира специјални тркала со гуми од 40 инчи.
Дали сте тврдокорен поддржувач на Доналд Трамп, сè уште ја славите неговата историска победа на претседателските избори во 2024 година и имате 156.999 долари на страна? Дали сакате луѓето да ве забележат додека возите монструозно возило со 6 тркала? Ако одговоривте да, можеби штотуку го најдовме совршеното возило за вас.
Пред вас е "Apocalypse Hellfire 6×6". Американската компанија "Apocalypse Manufacturing" со години ги гради овие екстремни теренски камиони базирани на "Jeep Gladiator", а еден од нив дури се појави и во „Jay Leno’s Garage“ во 2021 година.
Овој конкретен "Hellfire", направен во 2023 година, има специјална црвено-бело-сина обвивка во чест на новоизбраниот претседател на САД. Можеби отстранувањето на оваа впечатлива фолија од надворешноста би било паметен потег за да им се допадне на поширок спектар на купувачи, но очигледно продавачот верува дека ќе најде некој кој со задоволство јавно ќе ја покаже својата поддршка за Трамп.
Кога не е во Белата куќа, Доналд Трамп поминува многу време на Флорида, па можеби ќе може да го купи и да го замени претседателскиот "Cadillac The Beast" со ова возило, пишува "CarScoops".
Во процесот на претворање на "Gladiator" во верзија 6×6, Apocalypse Manufacturing додава трета осовина и монтира специјални тркала со гуми од 40 инчи.
Исто така, овој гломазен "Jeep" има редизајнирана предна табла со нова решетка и фарови, како и карактеристични предни и задни странични панели.
Промените не изостанаа во внатрешноста, која сега вклучува светлосини контрастни шевови. Посебен амблем со извезен мотив на облак налик печурка, најверојатно сцена од нуклеарна експлозија, се наоѓа на воланот.
Иако овој детал е интересен, можеби е несоодветен со оглед на ветувањето на Трамп дека ќе стави крај на војните, а не да започне нови.
