Невообичаениот звук не им дава на жителите да спијат за време на бури и невреме. Облакодерот во центарот на Манчестер произведува бучава од солидни 78 децибели, што е прилично гласно.

Колку е гласен?

„80 децибели е еквивалентно на бучавата на прометна градска улица, која може да ви го оштети слухот ако сте изложени на неа подолго време (повеќе од 8-10 часа на ден). Тоа е звук на телефонско ѕвонење, фен, како и гласен аларм“, објаснува „Decibelpro“.

Главните виновници за звукот кој го емитува „Beetham Tower“ се украсните стаклени плочи и металната конструкција на горниот дел од зградата. Кога ветерот поминува преку рабовите на стаклените плочи, се создава турбуленција која се засилува со резонанција и така облакодерот произведува морничав звук на завивање за кој инженерите не можат да најдат решение, а сличен звук можат да произведат и самите луѓе со дување во празно стаклено шише. Отстранувањето на стаклото и поставувањето перничиња од пена и алуминиумските цевки на покривот на облакодерот не помогнаа – звукот се засилува со засилувањето на ветерот, а жителите можат да го слушнат од речиси 300 метри оддалеченост.

Облакодерот има 47 катови и е изграден во 2006 година. Во тоа време, со својата висина од 169 метри, беше прогласен за првиот вистински британски облакодер надвор од Лондон. Освен што е висок, облакодерот е и исклучително тенок и е една од најтенките градби во светот, ако се земе предвид односот висина и дебелина.