Обичаите и традициите се различни во земјите ширум светот. Од фрлање чевли, пудинзи, криење метли и обожавање на козата – земјите ширум светот негуваат некои навистина бизарни божиќни традиции. Некои од нив датираат стотици години, додека други се создадени пред само неколку децении.

Во духот на празничната ексцентричност, погледнете 12 од најчудните обичаи од целиот свет, пишува британски „Индепендент“.

Германија и Австрија – Крампус

Во австро-баварскиот фолклор, Крампус е страшниот пријател на Дедо Мраз, ѓаволско суштество кое ги казнува палавите деца за време на празничната сезона. Митскиот влакнест ѕвер со копита и големи рогови „се појавува“ секоја година на 5 декември во многу градови низ Германија и Австрија на фестивалот наречен „Крампуснахт“, често обележан со парада во која стотици луѓе се облекуваат како Крампус и се бркаат меѓу себе низ улици.

Каталонија – Фигура што врши нужда

Постојат неколку чудни каталонски традиции, но можеби најбизарната е онаа наречена „caga tio“ или „pee log“. Дванаесет дена пред Божиќ, се прави насмеано суштество од трупец и се става на трпезариската маса. Секојдневно треба да се храни со овошје, јаткасти плодови и слатки. На Бадник, трупецот го удираат со стапови за да ја „исфрли“ својата добрина.

Друг каталонски обичај со слична конотација е таканаречениот каганер, мала фигура за нужда која традиционално се појавува во сцените на раѓањето. Во последниве години, каганерите што се продаваат во продавниците и на божиќните пазари низ регионот добија форма на познати личности, од Доналд Трамп до фудбалери.

Венецуела – Возење со ролери до црква

Во Каракас, главниот град на Венецуела, одењето на црковна миса добива радосен карактер. Имено, луѓето одат на миса со ролери, а патиштата се затворени за сообраќај, особено меѓу 16 декември и Бадник.

Јапонија – Пржено пилешко

Божиќ не е национален празник во Јапонија, но тоа не ги спречува многу луѓе да го слават. Се вели дека Дедо Мраз има очи на задниот дел од главата за да внимава на палавите деца, а покрај јапонската божиќна торта составена од бисквити, шлаг и јагоди, многу Јапонци одат во синџирот за брза храна КФЦ (KFC) на пржено пилешко за Божиќ. Инаку, неделата пред Божиќ е наводно најпрофитабилната недела за ланецот за брза храна во Јапонија.

Португалија – Сеќавање на мртвите

Во Португалија, Божиќ е исто така време за сеќавање на мртвите, така што семејствата поставуваат дополнителни места на трпезариската маса на Бадник (или понекогаш божиќно утро) за починатите роднини. Оваа практика се нарекува конзода и се верува дека носи среќа на семејството.

Чешка – Фрлање чевли

За време на Божиќ, Чехинките користат паметен трик за да го предвидат нивниот љубовен живот за следната година. Невенчаните жени стојат со грб кон влезната врата и ги фрлаат чевлите преку рамениците. Ако чевелот падне со палецот свртен кон вратата, тие веруваат дека ќе планираат свадба во следните 12 месеци.

Норвешка – Криење метли

Во Норвешка се смета дека Бадник се совпаѓа со доаѓањето на злите духови и вештерки. За да се заштитат, семејствата ги кријат сите свои метли и џогери пред спиење. Но како ја чистат куќата останува мистерија.

Украина – Пајажина на дрвја

Украинските новогодишни елки традиционално се украсуваат со лажни пајакови мрежи. Обичајот, за кој се вели дека носи среќа, потекнува од древна приказна за сиромашна жена која не можела да си дозволи да го украси своето дрво. Таа се разбудила на божиќното утро и открила дека пајак ја прекрил елката со светлечка мрежа.

Гренланд – Кожа од кит за вечера

Ако мислите дека никулците се лоши, пробајте едно од гренландските божиќни специјалитети. Матак – сурова кожа од кит со лој – е еден од нив. Друго е кивијакот, јадење што се состои од визон (мала птица) завиткано во кожа од фока, која се закопува неколку месеци, а потоа се јаде откако ќе се распадне.

Индија – Манго дрвја

Само околу 2,3 отсто од населението во Индија се христијани, но тоа е околу 25 милиони луѓе. Божиќ се слави со полноќна миса и подароци, но во отсуство на новогодишни елки или борови, Индијците наместо тоа украсуваат дрвца банана и манго.

Скандинавија – Божиќна коза

Тоа е традиционален скандинавски божиќен симбол и се верувало дека е дух што ќе се појави пред празникот за да се увери дека прославите ќе поминат добро. Во подоцнежните векови, козата давала подароци, но потоа била заменета со Дедо Мраз. Денес, малите кози направени од слама се популарни украси на елките низ Скандинавија.

Словачка – Фрлање пудинг на таванот

Во Словачка како дел од божиќната вечера се негува интересна традиција. Најстариот член на семејството треба да го фрли пудингот (обично направен од млеко, леб, семе од афион и нешто слатко) на таванот. Количината што ќе се задржи на таванот укажува на среќата што секој треба да ја добие во наредната година.