Раперот и продуцент Кертис „50 Сент“ Џексон работи на документарен филм за Нетфликс во кој детално се опишува историјата на наводните злосторства на Шон „Диди“ Комбс, потврди публицистот на Џексон.
Комбс беше обвинет и уапсен во Њујорк претходно овој месец по повеќе обвиненија, вклучително и рекетирање и сексуална трговија, кои следеа по повеќегодишните обвинувања дека хип-хоп ѕвездата ја користелa својата моќ за физички и сексуално да злоставува жени.
Документарниот филм, кој моментално е во продукција, ќе го режира Александрија Стејплтон, која заедно со 50 Сент е наведена како извршен продуцент. Џексон и Стејплтон во соопштението рекоа дека тоа е „сложена приказна која опфаќа децении, а не опфаќа само досега видени наслови или исечоци“, и дека имаат намера да „претстават автентични и нијансирани перспективи“.
„Иако обвиненијата се вознемирувачки, ги повикуваме сите да запомнат дека приказната за Шон Комбс не е целосна приказна за хип-хопот и неговата култура“, велат тие. „Нашата цел е да осигураме поединечни акции да не го засенат поширокиот придонес на културата“.
Комбс ги отфрли обвинувањата против него, нарекувајќи ги тужбите „грабнување на пари“. Адвокатот на Комбс во изјавата по неговото апсење рече дека тој „не е совршена личност, но не е криминалец“.
50 Сент и Пи Диди со години имаат жестоко јавно ривалство, документирано од медиумите на поп културата, а Џексон стана особено отворен критичар на Комбс, бидејќи обвинувањата за сексуално злоставување против него се нижеа во последните година дена. 50 Сент веќе неколку месеци го најавува документарецот на социјалните мрежи.
Апсењето на Комбс доаѓа речиси една година откако против него беше поднесена првата од 10-те тужби за сексуален напад и 6 месеци откако Министерството за внатрешна безбедност изврши рација во неговите вили. Хип-хоп магнатот, кој е во притвор без кауција, е обвинет за создавање голем криминален потфат кој му помогнал да злоупотребува, да им се заканува и да принудува жени и други да ги „исполнуваат неговите сексуални желби, да го заштитат неговиот углед и да го прикријат неговото однесување“.
Меѓу злосторствата за кои се теретат Комбс и неговите соработници се сексуална трговија, дистрибуција на наркотици и киднапирање. Многу од наводните злосторства се случиле на нелегални сексуални забави каде што тој, наводно, фрлал предмети по жртвите и ги влечел за коса, и каде што неговите соработници наводно дистрибуирале наркотици за да ги принудат жените на односи.
50 Сент во едно претходно интервју тврдеше дека тој е „единствениот што зборувал за тоа многу порано“ што стигна до насловните страници, а на Твитер се огласи, велејќи: „Не ми верувавте, се обложувам дека сега ќе ми верувате“.
