Во лето, кога високите температури се над просекот, патувањето со автомобил може да стане покомплицирана задача од вообичаено, како за возачот и патниците, така и за нашите возила, пишува "Klix.ba".

Губење на енергија и зголемена потрошувачка

Како топлината влијае на перформансите на класичниот SUS мотор? Моторот со внатрешно согорување, било да е тоа бензин или дизел, е под влијание на надворешните температури веќе над 25 степени, а проблемите се влошуваат над 30 степени. За да разбереме како надворешната температура влијае на моторот со внатрешно согорување, прво мора да разбереме како работи.

Така, во внатрешноста на цилиндрите се внесува воздух и се вбризгува гориво, чија мешавина ќе предизвика експлозија која ќе ги придвижи клиповите и тоа ќе генерира сила неопходна за движење на тркалата на возилото. Кога велиме дека топлината не му помага на моторот да работи најдобро, тоа е затоа што топлиот воздух што треба да влезе во цилиндрите има помалку кислород во него. Така смесата во моторот нема да биде идеална.

Ова има два директни ефекти врз перформансите на моторот. Од една страна, моторот може да претрпи губење на моќноста, а ситуацијата може да се влоши ако моторот е потпомогнат од турбополнач. Од друга страна, потрошувачката на гориво ќе се зголеми бидејќи моторот, за да го компензира недостатокот на кислород, ќе се обиде да ја направи смесата побогата со вбризгување на повеќе гориво, што ја намалува автономијата.

Многу е важно системот за ладење да функционира правилно при сето ова и нивото на течноста за ладење да биде во нормални граници. Важно е правилно да се одржува возилото и периодично да се проверуваат основните параметри и течности. Уште подобро ако патувате во раните утрински часови.

Како топлината влијае на електричните возила?

Екстремната топлина не влијае само на моторите со внатрешно согорувње, туку и автомобилите со електрични мотори може да наидат на проблеми, но во помала мера. Како и "SUS" моторите, тие исто така имаат систем за ладење кој се грижи за дисипација на топлина за време на работата.

Сепак, постои вистински проблем со екстремната топлина во електричното возило, а тоа е што иако моторот не е толку засегнат, батеријата е таа што навистина страда.

Батеријата на електричното возило оптимално работи во температурен опсег помеѓу 20 и 25 степени. Ако овие бројки се надминат, електрохемиските реакции што се случуваат во внатрешноста на батеријата се забрзуваат, што влијае на нејзината изведба и работниот век.

Експертите истакнуваат дека проблемот лежи во намалувањето на електричниот опсег поради топлината во батериите. Без да се земат предвид други фактори, како што се теренот, употребата на климатизацијата или стилот на возење, батеријата може да претрпи намалување на опсегот за 2,8 проценти на 27 степени, 5 проценти на 32 степени, 15 проценти на 35 степени и опсегот може да се намали до 31 отсто на температура на воздухот над 38 степени. Како и кај моторите со внатрешно согорување, системот за течно ладење е од суштинско значење за нивното правилно функционирање.