„Tesla“ е единствен бренд на електрични автомобили во странска сопственост на каталогот за купување кој го објавила владата на провинцијата Џангсу во источна Кина. Останатите брендови вклучуваат „Volvo“, во сопственост на кинескиот „Geely“ и државниот „SAIC“.

Тоа значи дека владините агенции и јавните групи во провинцијата можат да ги набават како сервисни возила, нагласувајќи го пријатниот однос на Кина со компанијата на Илон Маск.

Развојот станал вирален на кинеските социјални мрежи, а некои корисници го поставуваат прашањето дали владата треба да зема предвид странски автомобили.

Владата во Џангсу се обидела да ја ублажи таквата загриженост велејќи дека моделот „Тесла“ е домашен автомобил, а не увезен, се наведува во извештајот на државното списание „National Business Daily“ во четврток, цитирајќи еден владен службеник.

Компанијата „Tesla“, која има огромна гигафабрика во Шангај, произвела околу 947.000 автомобили во Кина во 2023-та година, а повеќето се користени локално.

Владата не одговорила на телефонските повици на „CNN“. Во владиниот каталог за купување, моделот „I“ на „Tesla“ произведен во Шангај бил наведен по цена од 34.377 долари.

Кина станала се поважен пазар за „Tesla“, бидејќи таа земја сочинува повеќе од половина од вкупната светска продажба на електрични автомобили. Минатата година „Tesla“ речиси една четвртина од својот вкупен приход го остварила од Кина.

Но, американскиот произведувач на автомобили исто така се соочува со сè поголема конкуренција од кинеските ривали. „BYD“ ја помина „Tesla“ во последниот квартал од 2023-та година како најголем продавач на електрични возила на планетата. „Tesla“ ја врати својата позиција во првата половина од оваа година, но не за многу.

На автомобилите на „Tesla“ претходно им беше забранет влез во некои владини и воени комплекси во Кина поради шпионажа и загриженост за безбедноста на податоците.

Тие ограничувања беа укината во април, кога државното авто-здружение објавило дека автомобилите на „Tesla“ ги исполниле кинеските барања за безбедност на податоците. Соопштението пристигнало истиот ден кога Маск го посетил Пекинг и се состанал со премиерот Ли Чанг, кој ја пофалил „Tesla“ како успешен модел за соработка меѓу САД и Кина.

ЕУ царини

Но, на повеќето фронтови, тензиите меѓу Кина и Западот растат.

Европската комисија во четвртокот потврди дека од денес ќе воведе дополнителни царини до 37,7 проценти на увозот на електрични возила произведени во Кина.

Тарифите, кои прв пат биле објавени на почетокот на јуни, се сметаат за неопходен потег на ЕУ да спречи поплава од евтини кинески автомобили направени со неправедна поддршка од владата.

„Tesla“, голем извозник на електрични возила произведени во Кина во Европа, побарал посебна пресметка на тарифата, наведува Комисијата. Моментално, компанијата се соочува со просечна дополнителна тарифа од 20,8% како дел од групата компании кои соработуваат во истрагата на ЕУ.