Калифорниската компанија „Alef Aeronautics“ најави дека наскоро ќе започне со производство на првиот летечки автомобил.
„Alef“ го претстави летечкиот автомобил „Alef Model A“ на почетокот на годинава на огромен интерес, а сега објавија дека добиле повеќе од 3.200 нарачки, што е доста ако се земе предвид дека моделот чини околу 300.000 долари.
„PUCARA Aero“ и „MYC“, со искуство во производство на делови за „Boeing“ и „Airbus“, започнаа заедничко вложување и потпишаа договор за производство на делови за „Alef“. Првите примероци на овој летечки автомобил треба да бидат произведени до крајот на следната година.
Калифорниската компанија, која е поддржана и од „Space X“, го претстави „Model A“ на почетокот на годината. Станува збор за двосед кој функционира како електричен автомобил опремен со четири електрични мотори во режим на патничко возило.
На долната страна има осум пропелери, а во режим на летање кабината се ротира за 90 степени, па предниот и задниот дел на возилото служат како крило. Според најавите на производителот, автомобилот треба да помине до 320 километри на пат и до 180 километри во воздух.
