Хидратацијата е многу важна, особено во жешките летни денови, па не е лошо секогаш при рака да имате шише вода. Меѓутоа, важно е да избегнувате вода која се загреала во пластично шише бидејќи тоа не е најдобрата опција.
Имено, кога водата во пластично шише е изложена на високи температури, на пример во автомобил или покрај прозорец, нејзиниот квалитет може да стане сомнителен.
Експертката за храна и безбедност на „Storage Box Shop“, Сара Лосон, вели дека вообичаениот чин на пиење топла флаширана вода може да носи скриени здравствени ризици за кои многумина од нас не се свесни.
„Не пијте флаширана вода што била на сонце или во топла средина, како што е автомобил. Топлината може да предизвика истекување на штетните хемикалии од пластиката во водата. Одржувањето на хидратацијата е важно, но пиењето вода која била на топло не е безбедно. Флашираната вода секогаш чувајте ја на ладно за да го заштитите вашето здравје“, навела Лосон.
Кога флашираната вода се загрева, хемикалиите од пластиката може да стигнат до водата. Тие хемикалии, како БПА и фталати, можат да бидат штетни ако ги пиете. Пиењето вода со овие хемикалии може да предизвика здравствени проблеми.
Ако пиете топла вода од пластично шише, може да имате желудочни проблеми, гадење, болки во стомакот, главоболки, вртоглавица и проблеми со хормоните.
Затоа, секогаш чувајте ја флашираната вода на ладно место и избегнувајте да ја оставате на директна сончева светлина. Ако е можно, оставајте ја во фрижидер или користете коцки мраз.
Телото може да го одржувате хидрирано и со помош на храна која е богата со вода, како што се: краставици, зелена салата, домати, спанаќ, печурки, лубеница, диња, јагоди, брокула, портокали и грозје.
