Поради растот на примена на вештачка интелигенција во бројни индустрии, како што се роботи за автономна испорака и такси без возач, многу е лесно да се замисли дека вештачката интелигенција ќе замени некои работни места во иднина. Ова го поткрепува и извештајот на Глобалниот институт МекКинзи, според кој до 2030 година до 30 отсто од работните часови во американската економија би можело да се автоматизираат.
Познатиот експерт за вештачка интелигенција Марк Миневич, кој штотуку објави нова книга на оваа тема наречена „Нашата планета напојувана од вештачка интелигенција“, се согласува со овие предвидувања. Тој објаснил дека верува дека роботите наскоро ќе преземат пет работни места.
Кои се најзагрозените работни места?
„Работните места за кои верувам дека се изложени на ризик да бидат заменети со вештачка интелигенција во наредните години се касиери, телемаркетери, возачи на камиони, книговодители, сметководители и радиолози“, тврди тој.
Тој објаснува како касиерите кои работат во супермаркетите и трговските центри се ранливи бидејќи компаниите како Амазон инвестирале во автоматизирани продавници.
„Телемаркетингот е зрел за промени преку разговорна вештачка интелигенција и чет-ботови кои можат да бидат убедливи“, заклучил тој,. Исто така смета дека голема промена ги очекува и возачите на камиони: „Возачите на камиони ќе се соочат со голем пресврт со порастот на автономните возила, што ќе се закануваат на милиони работни места ширум светот“.
Продолжувајќи да објаснува зошто работата на сметководителот може да избледува, Миневич рекол: „Книговодствените и сметководствените улоги се состојат од повторливи задачи за податоци кои наскоро ќе бидат обработени од алгоритми“.
Иноваторот, исто така, верува дека работните места како радиологијата наскоро би можеле да бидат заменети со вештачка интелигенција: „Дури и специјализираните работни места како радиологијата може да се заменат со вештачка интелигенција, со алгоритми за длабоко учење кои веќе одговараат или ги надминуваат човечките перформанси“.
Работите кои вештачката интелигенција најтешко ќе ги реплицира
Миневич објаснува како луѓето треба да се фокусираат на развивање креативни способности, кои на вештачката интелигенција ќе и бидат најтешки за да ги реплицира: „Со цел да не биде заменето со вештачка интелигенција, од клучно значење е луѓето да се фокусираат на развивање на нашите најприродни способности - креативност, емоционална интелигенција, флексибилност и стратешко размислување“.
„Работните места кои вклучуваат генерирање идеи, интеракција со луѓе и донесување сложени одлуки ќе бидат најтешки за реплицирање на вештачката интелигенција“, заклучил тој.
