„Horch 930S“ од 1939 година е еден од најретките луксузни автомобили. Има вграден мијалник со топла и ладна вода, седишта што се претвораат во кревет и V8 мотор.
На прв поглед изгледа како елегантен луксузен автомобил од 1939 година, но овој примерок крие детаљ што би ги изненадил и денешните возачи. Станува збор за „Horch 930S“, автомобил кој има вграден мијалник со топла и ладна вода.
Мијалникот се извлекува пред предниот браник, а топлата вода доаѓа од систем поврзан со ладењето на моторот. Да, добро прочитавте. Мијалникот бил вграден во автомобилот и можел да се извлече пред предниот браник кога тоа било потребно.
Така, патниците во овој луксузен автомобил можеле да имаат пристап до вода дури и за време на патувањето.
Сепак, мијалникот е само еден од деталите што покажуваат колку внимание се посветувало на удобноста и практичноста. „Horch 930S“ имал врати што се отворале широко, без средишен столб кој би го отежнувал влегувањето и излегувањето од возилото.
Седиштата можеле да се спуштат и да се претворат во простор за спиење, што го правело автомобилот погоден и за подолги патувања.
Посебно внимание привлекува и внатрешноста. Инструмент-таблата била изработена од полирано дрво, со бројни хромирани детали, поединечни кружни инструменти и часовник поставен во средината.
На вратите имало хромирани рачки, додека панелите биле обложени со квалитетна ткаенина. Прозорците се спуштале рачно, со помош на класичен механизам.
„Horch 930S“ имал и простран багажник, додека под хаубата се наоѓал V8 мотор со зафатнина од 3,8 литри и приближно 92 коњски сили.
За денешните стандарди ова можеби не изгледа импресивно, но станува збор за автомобил произведен во 1939 година, кога ваквите технички и луксузни решенија биле вистинска реткост.
Токму поради сето тоа, овој модел зазема посебно место во историјата на автомобилите. Биле произведени само неколку примероци, поради што „Horch 930S“ денес се смета за еден од најретките луксузни автомобили од своето време.
Додека денес производителите се натпреваруваат кој ќе понуди поголем екран, повеќе електронски системи и поудобни седишта, „Horch“ уште пред речиси 90 години имал идеја која и денес звучи неверојатно – автомобил со сопствен мијалник и топла вода.
