На снимката од настанот, која се појави на социјалните мрежи, се гледа како мажите се туркаат и се влечат под вода.

Што се случило?

Кинескиот инструктор по нуркање Сјао Ду, кој во моментот на инцидентот не бил на должност, тврди дека нуркал со пријател кога им се приближиле тројца други нуркачи.

Во изјава за локалните медиуми, Ду рече дека на местото имало премногу луѓе, поради што, според него, дошло до непријатната ситуација. Според неговата верзија, еден маж ненадејно му се приближил и го турнал.

Кога нуркачот се обидел да се оддалечи, го удрил Ду со пераите, тврди инструкторот. Ду се обидел да му ги тргне пераите настрана, но тој потег, според неговите зборови, довел до судир под вода.

На снимката што кружи на интернет се гледа и како друг маж, за кого Ду тврди дека е локален нуркачки водич, го фаќа за раката. Додека кинескиот инструктор се обидува да го оддалечи со нозете, другиот нуркач ја подава раката кон неговото лице.

Ду подоцна раскажа дека успеал да се оддалечи и да излезе на површината, по што, како што вели, решил да се соочи со мажите и да побара објаснување.

„Запознаени сме со снимката“

На друга снимка, направена на брод, се гледа како кинескиот инструктор му вика на маж што се наоѓа на друго пловило, пренесува „Daily Mail“.

„Вие ми се приближивте и ме зграпчивте. Се обидовте да ми го фатите регулаторот за дишење. Се обидовте да ме убиете под вода, сите тројца! Тројца на еден, тоа е многу безобразно“, се слуша како вели Ду.

Компанијата „Maldives Legend Fleet“, со која Ду и неговиот пријател биле на нуркачко патување, потврди дека се случил инцидент.

„Запознаени сме со снимката што кружи на интернет, а се однесува на инцидентот што се случи на 28 октомври 2026 година на локацијата Куда Ра Тила, меѓу нуркачи од еден од нашите бродови и водичи“, соопштија од компанијата.

Оттаму додадоа дека случајот го сфаќаат многу сериозно, нагласувајќи дека безбедноста им е на прво место и дека настојуваат да обезбедат безбедни услови на сите локации за нуркање.

Како што наведоа, ги сослушале своите гости и го проследиле случајот до надлежните органи за истрага. Бидејќи постапката е во тек, не сакале да изнесуваат дополнителни детали.

Упатен апел до јавноста

Директорот за продажба и маркетинг на „Maldives Legend Fleet“ потврди и дека еден од нуркачките водичи на компанијата бил суспендиран по инцидентот.

Според него, информациите со кои располага компанијата укажуваат дека судирот започнал по инцидент во кој биле вклучени водич од друг брод и еден од нивните гости, по што интервенирал нуркачкиот тим на компанијата.

„Свесни сме дека потоа беа изнесени сериозни обвинувања за однесувањето на нашиот стручњак за нуркање. Тие обвинувања, заедно со сите околности на инцидентот, треба внимателно и непристрасно да се испитаат“, наведе директорот.

Во случајот се вклучи и Националното здружение за пловидба на Малдивите (НБАМ), кое соопшти дека спроведува истрага.

Од здружението порачаа дека е неопходна темелна и непристрасна истрага за да се утврди дали имало несоодветно однесување, пропусти или небрежност од која било од вклучените страни.

Тие ги повикаа и полицијата на Малдивите, Министерството за туризам и другите надлежни институции да го испитаат случајот, а до јавноста упатија апел да не донесува избрзани заклучоци и да не изнесува обвинувања на социјалните мрежи пред да бидат познати резултатите од истрагата.