Двократната добитничка на Оскар гостуваше во емисијата на Дру Баримор, каде што отворено зборуваше за осудувањето со кое се соочуваат жените што одлучуваат да станат мајки подоцна во животот. Дел од разговорот беше објавен пред емитувањето на емисијата, закажано за 20 октомври.

„Жените добиваат многу критики кога раѓаат во поодминати години, додека мажите не поминуваат низ истото. Тоа е интересно“, рече Хилари.

Дру Баримор веднаш се согласи со неа, потсетувајќи дека мажите стануваат татковци дури и во осумдесеттите години и дека тоа никому не му изгледа толку необично.

„Како се осмелуваш? Престара си!“

Хилари особено се сеќава на една жена која отворено ѝ замерила што одлучила да роди во поодминати години.

„Како се осмелуваш? Престара си!“, ѝ рекла таа жена.

Потоа објаснила зошто таа жена размислува така. Нејзиниот татко ѝ бил најважната личност на светот, а таа го изгубила кога имала дваесетина години. Се плашела дека и децата на постарите родители прерано ќе останат без нив.

Хилари, наместо да се налути, се обидела да ја разбере нејзината болка. И самата го изгубила татко ѝ, за кого била многу приврзана.

„Повеќе би сакала да се родев, да ја запознаев таа личност што толку многу ја сакав и да ја имав во својот живот, отколку воопшто да не го доживеев сето тоа“, објасни актерката.

И токму со овој одговор го допре она за што ретко се зборува кога ќе се поведе расправа за доцното родителство. Никој не може да гарантира колку долго ќе живее, ниту колку години ќе помине со своите деца. Годините се важни за здравјето и бременоста, но сами по себе не кажуваат колку некој ќе биде добар родител.

На 48 години роди близнаци, а сега доаѓа и третото бебе

Хилари во 2023 година, на 48-годишна возраст, ги роди близнаците Аја и Ом, што ги доби со сопругот Филип Шнајдер.

Сега повторно е бремена, а веста ја соопшти на сосема необичен начин. На Инстаграм објави видео на кое таа, нејзиниот сопруг и децата танцуваат во темница, со светлечки ленти прицврстени на облеката. Во еден момент на нејзиниот стомак се појавува светлечка фигура на бебе.

„Многумина ме прашуваат на кој следен проект работам. Овој пристигнува во декември“, напиша таа покрај видеото.

И додека бројни обожаватели ѝ честитаа, повторно се отвори расправата за тоа дали е во ред да се стане мајка по педесеттата година.

Од кога туѓите години станаа грижа на сите?

Се разбира, бременоста во педесеттите години носи поголеми здравствени ризици отколку во помладата животна доба. Тоа не е прашање на мислење, туку на медицина, и бара внимателно следење од лекар. Не е ни секоја жена во можност да забремени на таа возраст.

Сосема друго прашање е зошто луѓето си даваат за право на непозната жена да ѝ одредуваат кога смеела да роди, колку долго ќе биде присутна во животот на своето дете и дали е себична затоа што посакала уште едно бебе.

Интересно е колку се менуваат тие мерила кога станува збор за маж. Постариот татко често се претставува како среќен човек кој добил нова можност да создаде семејство. Постарата мајка мора да ја објаснува својата одлука, да се оправдува и да одговара на непријатни прашања.

Хилари Свонк не се обидува да ги убеди сите жени да раѓаат во педесеттите години. Таа зборува за својот живот, своето семејство и одлуката што ја донела со сопругот.

А можеби токму тука се крие наједноставниот одговор на целата расправа: за здравствените ризици треба да се разговара со лекар, а не со непознати луѓе кои мислат дека имаат право да одлучуваат за туѓото мајчинство.