Целта е да се подобри протокот на сообраќајот, да се зголеми безбедноста и да се олесни движењето на сите учесници во сообраќајот.

Во австриската престолнина веќе се поставени околу 30 интелигентни семафори, а планирано е во наредните години сите 200 семафори со копчиња да бидат опремени со новата технологија.

Еден од таканаречените „семафори што размислуваат“ се наоѓа во вториот виенски округ, на крстосницата на улиците „Am Tabor“ и „Trunnerstraße“.

На почетокот на септември и Флоридсдорф го доби својот прв семафор со вештачка интелигенција, на крстосницата на улиците „Donaufelder Straße“, „Theodor-Körner-Gasse“ и „Plankenbüchlergasse“.

Од надлежниот градски оддел MA 33, познат како „Wien leuchtet“, за австрискиот „ОРФ“ наведуваат дека ваквите семафори придонесуваат за заштита на животната средина, поголема безбедност и поефикасно одвивање на сообраќајот, објави австрискиот јавен сервис „ОРФ“.

Семафорите препознаваат патерици, инвалидски и детски колички

Паметните семафори користат камери и сензори кои надгледуваат простор од приближно 30 квадратни метри. Системот препознава колку лица стојат пред семафорот, но и кој навистина има намера да ја премине улицата. Вештачката интелигенција истовремено проценува колку време е потребно за безбедно преминување на пешачкиот премин.

Посебно внимание им се посветува на лицата со намалена подвижност, вклучително и на корисниците на инвалидски колички, како и на родителите со детски колички.

Доколку системот, на пример, препознае лице кое користи помагало за одење, автоматски го продолжува траењето на зеленото светло за да му овозможи доволно време безбедно да ја премине улицата.

На овој начин, градските власти сакаат сообраќајот да го направат попристапен и поприспособен на различните потреби на граѓаните.

Дали камерите ги снимаат граѓаните?

Едно од прашањата што се поставуваат во врска со новата технологија е заштитата на приватноста, со оглед на тоа што семафорите користат камери за препознавање на учесниците во сообраќајот.

По претставувањето на втората генерација на системот, неговите производители соопштија дека снимките од камерите се бришат во рок од 50 милисекунди, но дека одредени податоци, по потреба, можат да се чуваат подолго.

Како што беше објаснето, станува збор исклучиво за информации за бројот на препознаени лица на преминот и за категориите на кои им припаѓаат.

Овие податоци можат да се користат за меѓусебно усогласување на семафорите и оптимизирање на нивната работа.

Во врска со загриженоста поради можниот надзор на граѓаните, од Град Виена наведуваат дека снимките од системите што моментално се користат воопшто не се чуваат.

„Не се чуваат никакви снимки од системите што работат во реални услови, а обработката на податоците се одвива исклучиво локално, на самото место“, соопштија градските власти.

Како што се додава, не постои ниту мрежна врска преку која би можело да се пристапи до камерите.

Следниот чекор е давање предност на јавниот превоз

Системот на паметни семафори е развиен на Техничкиот универзитет во Грац, а неговата втора, унапредена генерација се користи од декември 2024 година.

Благодарение на поголемата компјутерска моќ и моделот на длабоко учење (deep learning), новата технологија не овозможува само препознавање на лица со ограничена подвижност, туку и истовремено следење на повеќе пешачки премини.

Истражувачите од Техничкиот универзитет во Грац моментално работат на дополнително унапредување на системот, со цел во него уште поефикасно да го вклучат и јавниот превоз.

Целта е во иднина да се овозможи подобро усогласување на работата на семафорите со движењето на возилата од јавниот превоз, со што дополнително би се подобрил протокот на сообраќајот во австриската престолнина.