Студент од Грузија (25), кој студира во Салцбург, доживеал необична ситуација откако банката по грешка му исплатила повеќе од 120.000 евра. Студентот, всушност, сакал да подигне 12.900 евра, кои претходно ги позајмил од пријател за да докаже дека има доволно пари за добивање дозвола за престој во Австрија.
Откако ги подигнал парите во филијалата на банката „Sparkasse Salzburg“, му ги предал на пријателот, исто така Грузиец, и заминал на тренинг. Не ни претпоставувал дека од банката излегол со многу повеќе пари отколку што побарал. Дури по тренингот му се јавиле од банката и го известиле дека при исплатата дошло до грешка.
Дури тогаш сфатиле колку пари добиле
Студентот веднаш му се јавил на пријателот, а потоа заедно провериле колку пари има во торбата. Австриските медиуми објавиле снимка на која се гледа како во автомобилот ги прегледуваат купчињата банкноти. Неговиот пријател за австрискиот јавен сервис ORF признал дека толкавата количина пари го изненадила, но и го загрижила. Бил свесен дека би можеле да западнат во сериозни проблеми доколку одлучат да ги задржат парите.
Двајцата млади се вратиле во банката, каде што вработените повторно ги пребројале парите и утврдиле колку му било исплатено на студентот по грешка. Целиот вишок пари ѝ го вратиле на банката.
За враќањето на повеќе од 100.000 евра добил - гумени бонбони
Од банката „Sparkasse Salzburg“ потврдиле дека до грешката дошло поради човечки пропуст. Му се извиниле на студентот за непријатноста и му се заблагодариле за соработката и разбирањето. Сепак, за враќањето на повеќе од 100.000 евра студентот не добил никаква парична награда. Банката, во знак на благодарност, му подарила пакување гумени бонбони со своето лого.
