Коосновачот на „Microsoft“, Бил Гејтс, предупреди дека светот мора многу посериозно да се подготви за „турбулентната ера на вештачката интелигенција“, пред голем број вработени да останат без работа или да бидат принудени да работат помалку отколку што сакаат.

Гејтс предупреди дека роботите би можеле да ги загрозат и физичките работни места. Иако влијанието на вештачката интелигенција досега беше најизразено во канцеларискиот сектор, Бил Гејтс верува дека наскоро следува промена благодарение на сè поевтините и поспособни роботи, пишува „Business Insider“.

Тој нагласува дека јавноста ја потценува брзината со која напредуваат моторичките способности на новите машини. Иако хуманоидните роботи сè уште не се масовно присутни во фабриките и услужниот сектор поради софтверските ограничувања и недоволната прецизност при извршување посложени задачи, Гејтс предвидува дека веќе до крајот на деценијата би можеле да станат директна конкуренција на луѓето во градежништвото и угостителството.

„Резервирано за луѓе“

Иако вештачката интелигенција и роботиката напредуваат со огромна брзина, Бил Гејтс смета дека општеството свесно ќе одлучи одредени професии да ги задржи во рацете на луѓето – преку концептот што тој го нарекува „резервирано за луѓе“.

Како пример го наведува соопштувањето тешки дијагнози, каде што технологијата можеби ги има потребните технички способности, но не и етичкото и емоционалното право да го замени човекот. Врз неговиот став влијаело и личното искуство со негувателите на неговиот татко, кој боледувал од Алцхајмерова болест, чија способност да ги препознаат неискажаните потреби ја оценил како незаменлива. Гејтс верува дека во секторите како образованието и менталното здравје, вештачката интелигенција ќе служи како поддршка, но водечката улога и одговорноста мора да останат во рацете на луѓето.