Луѓето би можеле да живеат со векови доколку научниците успеат да развијат постапка за трансплантација на глава на друго тело, изјави за Риа Новости, Сјаопинг Рен, директор на Одделот за ортопедија при Втората придружна болница на Универзитетот за традиционална кинеска медицина.
„Ако го одржуваме телото младо и ја пресадиме главата на него, тогаш, од научна гледна точка, веќе имаме доказ дека тоа е можно“, изјавил Рен, одговарајќи на прашањето дали трансплантацијата на глава би можела да им овозможи на луѓето да живеат со векови.
Тој додал дека оваа тема бара внимателно проучување, но дека таквата постапка би можела наскоро да стане изводлива, со оглед на тоа што слични истражувања веќе биле спроведени врз животни.
Италијанскиот хирург Серџо Канаверо на крајот на февруари 2015 година го најавил започнувањето на проектот ХЕВН/АХБР, во чии рамки планирал да изврши трансплантација на главата на доброволец со поврзување на ’рбетниот мозок и мозокот со помош на постапка што ја нарекол „протокол ГЕМИНИ“.
Канаверо и Рен на крајот на 2016 година претставиле глувци и мајмуни со трансплантирани глави.
Подоцна, научниците објавиле дека во Кина била извршена трансплантација на главата на починато лице на телото на друго починато лице, во текот на сложена операција што траела 18 часа.
Во овие постапки биле користени ултратенок јаглероден нанонож, полиетилен гликол — супстанција што им помага на нервните влакна да се поврзат — како и специјална техника за стимулација на ’рбетниот мозок на местото на засекот, со цел да се воспостават врски меѓу невроните.
