Постојат филмови кои спаѓаат во категоријата „толку е лош што е добар“… А потоа тука се и „грди“, „морничави“, „ужасни“ и „катастрофални“.

Тоа се само дел од изразите со кои се опишува „Ниу Лаи“ („Кравата доаѓа“), новиот кинески анимиран филм во режија на Син Јумен, а во продукција на компанијата „Dalian Jingyuan Culture Film and Television Media“, која претходно се занимавала со дизајн на ентериери и декорација, пишува „Јуроњуз“.

Филмот беше исмејуван поради лошата анимација и неквалитетните ефекти, а дури се појавија и повици кината да престанат да го прикажуваат.

Меѓутоа, дојде до целосно неочекуван пресврт – филмот одеднаш привлече огромно внимание.

„Ниу Лаи“ започна да се прикажува во кината со слаба заработка и многу лоши критики. Вкочанетата анимација, лошата гласовна глума и апстрактната приказна за штотуку родено теле кое расте и се соочува со љубовта и жртвувањето беа меѓу главните причини за критиките. Меѓутоа, приказните на гледачите и потсмевањето набрзо го претворија филмот во вирален феномен на кинеските социјални мрежи.

Во првите десет дена по премиерата на 5 август, филмот на киноблагајните заработи само околу 10.000 јуани, односно околу 1.281 евро. Според податоците на платформата за следење на филмската заработка „Маојан“, во одредени денови приходите изнесувале само 200 јуани, односно околу 25 евра. Меѓутоа, заработката на „Ниу Лаи“ до понеделникот скокнала на 8,2 милиони јуани, односно повеќе од еден милион евра. Вкупната заработка достигнала 17,1 милион јуани, односно околу 2,1 милион евра.

Поради тоа, филмот дури почна да се натпреварува со „Одисеја“ на Кристофер Нолан и моментално се наоѓа меѓу десетте најуспешни анимирани филмови според заработката во Кина во 2026 година.

Но, како дошло до тоа?

И покрај лавината од критики и мемиња, дел од гледачите ја прифатија едноставната анимација и почнаа да го препорачуваат филмот – некои како шега, а други како вистински „лек“ против содржините создадени со вештачка интелигенција кои ги преплавуваат алгоритмите на социјалните мрежи.

Токму тој рачно изработен изглед очигледно ја привлече публиката, која почна да го претставува „Ниу Лаи“ како добредојдена алтернатива на претерано исполираната студиска анимација.

Каде завршува иронијата, а каде почнува искреното воодушевување и понатаму е предмет на дебата…

Во секој случај, бројни обожаватели почнаа да споделуваат исечоци од филмот „Ниу Лаи“, фалејќи ја неговата енергија и покрај скромниот буџет и истакнувајќи ја работата на режисерката Син Јумен и Сун Лифанг. Според достапните информации, тие двајца се мајка и син кои на филмот работеле пет години, а биле задолжени за сценариото, гласовите и поголемиот дел од другите задачи во продукцијата.

Други, пак, едноставно рекле дека сакаат да го погледнат филмот за да видат „колку лош може да биде“, шегувајќи се дека Нолан сигурно е целосно изненаден што „Ниу Лаи“ станува неочекуван ривал на неговата „Одисеја“, која премиерно беше прикажана во Кина на 14 август.

Филмот стана толку популарен што кината, соочени со голема побарувачка, почнаа да додаваат нови термини за проекции. Со тоа се покажа дека понекогаш е доволно малку „врева“ на социјалните мрежи за еден филм да стане вистински кино-хит.

Очекувано, сите не се воодушевени од овој неочекуван успех на киноблагајните. Критичарите тврдат дека популарноста на „Ниу Лаи“ доаѓа на сметка на поквалитетни продукции.

Државниот весник „Beijing News“ предупреди дека кината ризикуваат да ја „изгубат довербата“ на публиката доколку „продолжат да ги намалуваат стандардите“ со додавање нови проекции на „Ниу Лаи“.

Весникот ги повика кината „да бидат чувари на квалитетот за публиката и јасно да ги отфрлат филмовите кои очигледно не ги исполнуваат стандардите, наместо да дозволат филмови како ’Ниу Лаи‘ неконтролирано да ги освојуваат кината“.

Без оглед на тоа дали публиката му се смее на филмот или навистина го сака, „Ниу Лаи“ успеа потсмевањето да го претвори во голем кино-успех, но и да стане еден од кинеските филмови со најголем поврат на вложените средства.