Ирскиот музичар Глен Хансард, кој од уличен свирач по улиците на Даблин стана меѓународно признат уметник благодарение на филмот „Once“ и песната „Falling Slowly“, наградена со Оскар, почина на 56-годишна возраст.
Според соопштението на ирската полиција, а како што пренесува списанието „People“, Хансард загинал во сообраќајна несреќа во која учествувал мотоцикл. Несреќата се случила во средата, на 29 јули, во близина на Даблин. Полицијата ги повика сите евентуални сведоци да се јават за да помогнат во истрагата за околностите на несреќата.
„Со скршено срце објавуваме дека Глен Хансард почина по сообраќајна несреќа во Даблин“, соопштија неговите претставници од ATC Management.
„Семејството на Глен е длабоко потресено од оваа трагична загуба и замолува за приватност во овој исклучително тежок период. Тие им се благодарни на сите за поддршката.“
Хансард е роден во 1970 година во Даблин. Како тинејџер го напуштил училиштето и со години свирел на улиците на ирската престолнина, а во 1990 година го основал рок-составот „The Frames“. Веќе следната година дебитирал на филм, толкувајќи го гитаристот Аутспен Фостер во филмот „The Commitments“ на режисерот Алан Паркер, со што стекнал препознатливост и надвор од Ирска.
Најголемиот успех во кариерата го постигна во 2008 година, кога заедно со чешката музичарка Маркета Ирглова го освои Оскар за најдобра оригинална песна со „Falling Slowly“, создадена за независниот филм „Еднаш“ (Once).
Хансард и Ирглова беа и главните актери во филмот, во кој играат двајца музичари што се запознаваат во Даблин и започнуваат заедничко музичко патување. Филмот ја освои наградата на публиката на фестивалот „Санденс“, а неговата бродвејска адаптација подоцна освои осум награди Тони, меѓу кои и онаа за најдобар мјузикл.
Покрај работата со „Д Фрејмс“, Хансард беше дел и од музичкото дуо „Д Свел Сизн“, а зад себе остави и успешна солистичка кариера. Неговиот албум „Didn’t He Ramble“ во 2016 година беше номиниран за наградата Греми за најдобар фолк-албум. Потоа следуваа албумите „Between Two Shores“ (2018), „This Wild Willing“ (2019) и „All That Was East Is West of Me Now“ (2023).
Во 2025 година повторно се здружи со Маркета Ирглова, кога „The Swell Season“, по повеќе од една деценија, го објавија новиот студиски албум „Forward“. Повремено му се враќаше и на филмот, компонирајќи музика за остварувањето „I'm Not There“, а гостуваше и во сериите „The Simpsons“, „Parenthood“ и „The Last Man on Earth“.
Музичарот беше татко на тригодишен син. Во интервју за Би-би-си во 2023 година изјави дека татковството целосно му го променило животот.
„Сега сум на сосема поинакво место од кога било досега. Тоа, на најубав можен начин, целосно го преврте сето она што мислев дека го знам“, рече тогаш Хансард.
Освен по музиката, беше препознатлив и по својата хуманитарна работа. Од 2010 година ја организираше традиционалната божиќна улична свирка во Даблин за собирање средства за бездомници, на која низ годините настапуваа Боно, Шинејд О’Конор, Имелда Меј и Шејн Мекгован.
Од хуманитарната организација „Даблин Сајмон Комјунити“ соопштија дека се „скршени од болка“ по веста за неговата смрт.
„За многумина беше музички гениј и извонреден раскажувач, но за нас беше многу повеќе од тоа – човек со огромна дарежливост, искрен поддржувач на нашата работа и голем борец против бездомништвото. Неговата човечност, сочувство и посветеност кон социјалната правда ќе останат негово трајно наследство“, наведоа од организацијата.
