„Volkswagen“ денес ја одржа светската премиера на новиот електричен компактен SUV „ID. Cross“, кој на германскиот пазар ќе има почетна цена од 27.995 евра.
Новиот модел комбинира модерен дизајн, технологии преземени од повисоките автомобилски класи и пространа кабина за пет патници, поставувајќи нови стандарди во сегментот на малите и компактни автомобили.
„ID. Cross“ е долг 4.153 милиметри, широк 1.794 милиметри и висок 1.581 милиметар, со меѓуоскино растојание од 2.601 милиметар.
Нуди 475 литри багажен простор, а под предниот капак има дополнителни 25 литри за полначот и помали предмети.
Возилото е изградено на платформата „MEB+“, а ќе биде достапно во три верзии на моќност – 85 kW, 99 kW и 155 kW, како и со две батерии со капацитет од 37 kWh и 52 kWh.
Според „WLTP“ циклусот, досегот достигнува до 427 километри.
Брзо полнење и богата опрема
Брзото полнење е една од главните предности на новиот модел.
Помалата батерија се полни од 10 до 80 проценти за само 23 минути на DC полначи со моќност до 90 kW, додека поголемата батерија го постигнува истиот резултат за околу 24 минути, при моќност до 105 kW.
Во ентериерот се наоѓа 12,9-инчен инфозабавен екран, како и 10,25-инчен дигитален инструмент-панел пред возачот.
Како дополнителна опрема се нудат „Harman Kardon“ аудиосистем со моќност од 425 W и 10 звучници, пневматска масажна функција за предните седишта, како и панорамски покрив со димензии 74 × 90 сантиметри.
Возилото стандардно доаѓа и со функцијата „Vehicle-to-Load“, која овозможува напојување на надворешни уреди со моќност до 3,6 kW.
Меѓу технолошките новитети се издвојува системот „Connected Travel Assist“ со препознавање семафори, кој може автоматски да го запре возилото пред црвено светло, што претставува премиера во овој ценовен сегмент.
Достапни се и „Park Assist Pro“ со можност за далечинско паркирање преку паметен телефон, како и адаптивната „DCC“ суспензија, наменета за најмоќната верзија.
Цени и достапност
Нарачките за „ID. Cross“ од денес се отворени во Германија, а верзиите „Life“ и „Style“, со 155 kW мотор и 52 kWh батерија, ќе се продаваат по цена од 36.525 евра.
Основната верзија „Trend“, со 85 kW мотор и 37 kWh батерија, наскоро ќе биде достапна по 27.995 евра.
