„Geely“ следниот месец на кинескиот пазар ќе го претстави Galaxy TT, спортска лимузина која ќе биде директен ривал на моделот „Xiaomi“ SU7, иако официјалните цени сè уште не се објавени.
Како и поголемиот дел од новите електрични лимузини што доаѓаат од Кина, Galaxy TT се потпира на исклучително аеродинамичен дизајн, со цел отпорот на воздухот да биде сведен на минимум, а автономијата на возење значително да се зголеми, пренесува „CarScoops“.
Автомобилот ги поседува препознатливите визуелни карактеристики на својата класа, вклучувајќи мазен преден дел со LED светла, црни отвори за воздух и напреден LiDAR сензор поставен над предното ветробранско стакло, наменет за системите за автономно возење.
Страничниот профил е елегантен и минималистички, со рачки на вратите рамни со каросеријата, компактни ретровизори и нагласени задни крила.
На задниот дел доминираат LED светлата и препознатливата светлосна лента што се протега по целата ширина на возилото.
Кога станува збор за димензиите, Galaxy TT е долг 4.999 мм, широк 1.919 мм и висок 1.479 мм, додека меѓуоскиното растојание изнесува 2.920 мм.
Новиот модел е поставен на 800-волтна електрична архитектура и ќе биде достапен со три различни батериски пакети. Основната верзија располага со батерија со капацитет од 52,4 kWh, средната користи 63,8 kWh, додека врвниот модел е опремен со батерија од 75,2 kWh.
Автономијата на возење значително варира во зависност од избраниот пакет и се движи од 540 до 725 километри, според кинескиот CLTC циклус на тестирање.
Купувачите ќе имаат на располагање и две погонски конфигурации. Основните верзии ќе бидат опремени со електромотор поставен на задната оска, кој развива 329 коњски сили, додека помоќните изведби со два електромотори и погон на сите четири тркала ќе испорачуваат вкупно 570 коњски сили.
Иако овие бројки не се доволни за да го загрозат екстремниот „Xiaomi“ SU7 Ultra, тие се повеќе од конкурентни во споредба со средните пакети на опрема на моделите на „Xiaomi“.
Првите фотографии од ентериерот откриваат решенија што веќе станаа стандард кај кинеските премиум електрични автомобили.
Во кабината доминираат големиот централен мултимедијален екран, дигиталната инструмент-табла и спортскиот управувач со три краци. Покрај тоа, ентериерот е опремен со два безжични полначи за паметни телефони, кружни отвори за вентилација и мал аналоген часовник на инструмент-таблата, кој внесува дискретен ретро шарм.
