Станува збор за модел кој би можел да ја носи ознаката „iM4“, а првите неофицијални рендери веќе откриваат како би можел да изгледа.

Рендерите, изработени од Никита Чујко за магазинот „Kolesa“, се базираат на концептот „BMW M Concept Neue Klasse“, претставен на овогодинешната трка „24 часа Ле Ман“. Концептот го најавува идниот електричен „M3“, а се очекува токму на неговата платформа да биде развиен и новиот „M4“.

Препознатлив дизајн на „Neue Klasse“

Според рендерите, електричниот „M4“ ги задржува повеќето дизајнерски карактеристики на концептот.

Со предниот дел доминираат тенките осветлени „бубрези“, агресивните LED светла и карбонскиот преден спојлер, додека дневните светла се обликувани како мали квадратни елементи.

За разлика од концептот, кој има необични рачки на вратите слични на оние кај „Ford Mustang Mach-E“, на овие визуелизации се прикажани класични рачки вградени во линијата на каросеријата.

Задниот дел исто така го следи дизајнерскиот правец на концептот, со тенки LED светла, квадратни светла за магла интегрирани во браникот и голем заден дифузер.

Идниот сериски модел би требало да посвети големо внимание на аеродинамиката, па можно е да користи изразени „Venturi“ канали за зголемување на потисната сила.

До 1.000 коњски сили од четири електромотори

Според досегашните информации, електричниот „BMW iM3“ би требало да биде претставен следната година, додека купе верзијата „iM4“, која интерно ја носи ознаката „ZA2“, би можела да пристигне во 2028 година.

Двата модели би требало да користат четири електромотори, а во зависност од верзијата ќе развиваат од 700 па сè до 1.000 коњски сили.

Бензинскиот мотор останува во понудата

Добрата вест за љубителите на класичните спортски автомобили е што „BMW“ нема да се откаже од моторите со внатрешно согорување.

Како и новата генерација на „M3“, така и следниот „BMW M4“ ќе биде достапен со добро познатиот 3,0-литарски реден шестцилиндричен twin-turbo бензински мотор.

Засега не е познато колку бензинската и електричната изведба ќе бидат слични по изглед, но јасно е дека „BMW“ планира паралелно да ги нуди двете верзии.