Неодамна медиумите пишуваа за суперлуксузната јахта снимена во близина на некогашното омилено Титово летувалиште, а сега во центарот на вниманието се најде еден необичен жолт глисер.

Потсетува на култниот модел

На прв поглед, многумина би помислиле дека станува збор за посебен вид воден скутер, но всушност гледаме глисер кој по изглед потсетува на култниот „Fiat 500“.

Најверојатно станува збор за пловило од серијата „Car 500 Off Shore“ или за некој сличен италијански проект, инспириран од легендарниот автомобил.

Глисерот е долг околу 4,7 метри и може да прими до пет лица, пренесува „24sata.hr“.

Карактеристичната предна маска, тркалезните светла и ретро линиите јасно потсетуваат на популарниот италијански автомобил, додека задниот дел открива дека станува збор за чамец со вонбродски мотор.

Црвен спортски убавец

На хрватското крајбрежје е забележан и црвен спортски глисер кој инспирација пронашол во светот на „Ferrari“, „Lamborghini“ и другите суперавтомобили.

Неговите агресивни линии, нискиот труп и спортскиот изглед му даваат целосно поинаков карактер од споменатото „водно фиќо“ – помалку е наменет за опуштено крстарење, а повеќе за адреналин и брзина.

Кој би победил во трката?

Изгледот на пловилото укажува на должина од околу пет метри и мотор со моќност во распон од приближно 60 до 115 коњски сили. Тоа значи дека неговата максимална брзина најверојатно се движи меѓу 45 и 65 километри на час, во зависност од моторот, пропелерот и оптоварувањето.

Наспроти жолтото „фиќо“,спортските глисери како црвеното „Ферари“ често користат мотори со моќност од 150 до 300 коњски сили, а некои модели и значително повеќе. Во зависност од верзијата, можат да достигнат брзина од 70, па и над 120 км/ч.

Во хипотетичка трка меѓу овие две необични пловила, исходот веројатно би бил јасен – црвениот глисер би го оставил „фиќото“ зад себе. Сепак, на Јадранот брзината не е секогаш најважната категорија.

Додека црвениот глисер би победил во мерењето на брзината, жолтото пловило речиси сигурно би однело победа во една друга дисциплина – симпатиите на луѓето на брегот.

Понекогаш најголем впечаток, имено, не остава оној што е најбрз, туку оној што измамува најмногу насмевки.