Бразил ја оправда фаворитската улога и во соочувањето со Шкотска, па со две победи и едно реми го обезбеди првото место во групата и со зголемена самодоверба ќе влезе во нокаут фазата на Светското првенство.
Најдобар играч на Бразилеците на досегашниот дел од турнирот е Винисиус Жуниор кој стрелаше и против Шкотите и сега има четири погодоци зад неговото име.
Тој воедно добил и облог со селекторот Карло Анчелоти поради постигнатиот гол со глава.
- Му ветив на тренерот дека ќе постигнам гол со глава. Тој ми рече дека е речиси невозможно и дека ќе ми даде подарок ако успеам. Го чекам, - вели ѕвездата на Реал Мадрид.
- Тој е еден од најдобрите тренери во светот. Ги разбира своите играчи многу добро и совршено се прилагодува на нив. Доаѓа да ја подобри играта на секој тим што го води. Разбра како треба да играме тука и мислам дека тоа се исплатеше. Ќе се подобриме многу за време на натпреварувањето, а тој ќе му помогне на тимот да расте во текот на турнирот.
- Успеав да играм многу добро и да се подобрам бидејќи со години во репрезентацијата бев во ситуации каде што не можев да ја покажам мојата игра. Сега, со голем професионалец како него, можам да постигнувам голови и да играм одлични натпревари. Мислам дека тоа е резултат на напорна работа, посветеност и верба дека ќе се подобрам. Поради мојот талент, сè што вложив и постигнав во Реал Мадрид, бев сигурен дека во вистинскиот момент ќе играм уште подобро со бразилската репрезентација.
- Нема ништо подобро од тоа да бидам таму каде што отсекогаш сум сакал да бидам, претставувајќи го моето семејство и земја толку важна како Бразил. Ние ја бараме таа ѕвезда и не мислам дека има нешто подобро од тоа. Верувам дека ќе продолжиме да се подобруваме и јас ќе се подобрувам за време на натпреварувањето, - заклучи Бразилецот.
