„Ferrari“ го претстави својот прв електричен автомобил од 640.000 евра: Интернетот го исмејува

„Ferrari“ отсекогаш бил синоним за спој на заразна италијанска естетика и врвни перформанси кои одвреме-навреме ги поместуваа границите во индустријата на суперавтомобили.

Низ годините имаше и помалку убави и помалку атрактивни модели, но жолтата значка со црното исправено коњче на хаубата речиси секогаш гарантираше атракција, бруталност и сè она поради што љубителите ги обожаваат суперавтомобилите. Токму тоа се очекуваше и од првиот електричен автомобил на „Ferrari“, но она што италијанската компанија го претстави вчера ги шокираше нејзините фанови.

„Luce“ изгледа целосно стерилно, лишен од речиси сè што со години го красеше „Ferrari“. Многу работи објаснува и фактот што автомобилот го дизајнирал поранешниот главен дизајнер на „Apple“, Џонатан Ајв, кој од новото „Ferrari“ практично направил „iPhone“ на тркала.

Перформансите се и повеќе од добри – четири електромотори, по еден на секое тркало, испорачуваат вкупно 1050 коњски сили, автомобилот до „стотка“ стигнува за 2,4 секунди, а максималната брзина изнесува 310 км/ч.

Она што разочарува во време на сè поголема конкуренција е фактот што досегот на „Luce“ е околу 450 километри, што не изгледа премногу импресивно.

Особено ако се земе предвид дека „Luce“ чини неверојатни 640.000 евра.

Реакциите на социјалните мрежи се поразителни. Фановите го исмејуваат новото „Ferrari“, нарекувајќи го малку подобра „Toyota Prius“ или некаков електричен „Renault“ кој чини 20 пати повеќе.

„Tesla“ мирно спие“, „Човеку, што е ова!?“, „Prius на стероиди“ – се само дел од коментарите на „X“ и „Instagram“.