Мексиканскиот спортски новинар Фернандо Варгас доживеал вистински шок додека од автомобил во живо водел интервју.
Непознат маж со пиштол му ја отворил вратата и го ограбил пред илјадници гледачи.
Фернандо Варгас, спортски новинар и директор за комуникации на Мексиканската национална кошаркарска лига, во вторникот во градот Куернавака бил нападнат и ограбен додека од својот автомобил водел пренос во живо за спортската емисија „Bla, bla, bla Deportivo“.
Варгас седел на бензинска пумпа и давал интервју за емисијата кога непознат маж одеднаш ја отворил вратата од неговата страна.
Мажот со пиштол вперил оружје кон него и му се заканил:
„Клучевите, брзо. Клучевите, мобилните и паричниците, веднаш!“, рекол напаѓачот.
Варгас смирено земал неколку работи од автомобилот, излегол и цело време се обидувал да го смири напаѓачот.
🔴El periodista deportivo Fernando Vargas fue asaltado en plena transmisión en vivo en Morelos.
— Azucena Uresti (@azucenau) May 20, 2026
Mientras realizaba un enlace, sujetos abrieron su auto, lo obligaron a bajar y le quitaron sus pertenencias.pic.twitter.com/1vVgmZvNif
Водителот на емисијата Ед Мартинез немо ја следел целата сцена во шок, а преносот бил прекинат додека Варгас и напаѓачот сè уште разговарале.
Не е познато дали разбојникот воопшто знаел дека целиот инцидент се емитува во живо на телевизија.
Куернавака се наоѓа во мексиканската сојузна држава Морелос, веднаш јужно од Мексико Сити — градот што за помалку од еден месец ќе биде домаќин на отворањето на Светското фудбалско првенство.
Мартинез по инцидентот објавил на „Instagram“ дека Варгас поминал без повреди, но дека му биле украдени автомобилот, мобилниот телефон и паричникот.
„За среќа, тој е добро, но е многу исплашен. Ако некој го препознае човекот од видеото, ве молиме пријавете го кај властите. Ова се случи во Морелос“, напишал Мартинез.
Полицијата сè уште трага по напаѓачот.
