Како што рекла Софи Бучан до инцидентот дошло за време на нејзината посета на Лондон. Имено додека шетала ѝ пришол елегантно облечен млад пар. Тие благо ја потапкале по рамото и со лажна загриженост ѝ рекле дека во косата имала птичји измет, советувајќи ѝ да не го допира.

Иако новинарката ништо не почувствувала, ја обземало силно гадење. Нејзиниот партнер ѝ рекол дека едвај се гледало извалканото, но дека многу потсетувало на вистински птичји измет.

Кога двајцата странци се оддалечиле неколку чекори, одеднаш застанале и почнале да пребаруваат по својата чанта. По еден момент, ја повикале туристката, нудејќи ѝ влажни марамчиња за брзо да ја исчисти косата. Како што признала, поради нејзиното огромно гадење, таа била на дел од секундата од прифаќање на нивната наводна помош.

„За среќа моето момче имаше лошо претчувство, одлучно рече „не“ и ме одвлече оттаму“, напиша Софи на порталот „KentLive“.

Која е тактиката на крадците?

По враќањето во хотелот и брзото пребарување на интернет, новинарката открила дека била мета на однапред испланирана акција. Овој вид на измама е вообичаен во пренатрупаните туристичките градови.

Механизмот на дејствување на крадците е едноставен, но се заснова на силни емоции. Измамниците кои честопати работат во парови, незабележливо ја прскаат жртвата со течност што наликува на птичји измет. Супстанцијата може да биде бела, црна, кафеава, па дури и да имитира вистински мирис.

Убаво облечените „минувачи“ кои не предизвикуваат сомнеж го свртуваат вниманието на проблемот и нудат помош, давајќи марамчиња. Згрозениот турист го насочува целото свое внимание кон што побрзо чистењето на облеката или косата.

Додека едното лице помага со чистењето, другото незабележливо го краде паричникот, телефонот, а понекогаш дури и нежно го откопчува и го вади накитот.

Златни правила за безбедност на патниците

Новинарката на „KentLive“ истакнала дека со себе имала вредни предмети – фотоапарат, телефон и златен накит. За среќа, благодарение на присебноста на нејзиниот партнер ништо не загубила.

Во статијата за британскиот портал, таа споделила совети за сите кои ги посетуваат големите градови:

✔️Држете ја чантата блиску до себе и секогаш осигурајте се дека е потполно затворена.

✔️Користете ги двете раце кога фотографирате со вашиот фотоапарат или телефон за да му отежните на некој да ви го одземе уредот.

✔️Избегнувајте да го носите телефонот во задниот џеб.

✔️Бидете решителни. Ако ви се приближи странец и се чувствувате непријатно, веднаш оддалечете се. Во такви ситуации, безбедноста е поважна од убавото однесување.