Кумот на Холивуд, Ал Пачино, на 25 април го прослави својот 86-ти роденден. Природниот шарм и магнетизмот го направија не само славен актер, туку и познат освојувач на женски срца.

Ал Пачино никогаш не страдал од недостаток на обожавателки. Сепак, зад него не стои ниту еден брак. Дали тоа е затоа што актерот цел живот сакал само една жена?

Од црковни проповеди до домашни претстави

Потекнувајќи од сиромашно семејство на италијански емигранти, Пачино во младоста речиси завршил зад решетки, за подоцна да изгради имиџ на главен холивудски гангстер. Тешко е да се замисли дека на почетокот од кариерата Алфредо Џејмс Пачино можел да претпостави дека неговото име ќе стане синоним за мистериозен мажествен маж за кој сонуваат жени низ целиот свет.

„Родителите ми се разведоа кога бев многу мал. Бев единец и живеев во зграда во Јужен Бронкс со мајка ми, баба ми и дедо ми. Тешко врзувавме крај со крај.“

Низок по раст, слаб и воспитуван од строга баба, идниот актер бил повлечено и срамежливо дете. Неговото омилено хоби било одењето во кино, по што дома ги глумел сцените што ги гледал на платното, несвесно обликувајќи го својот талент.

Подоцна почнал да настапува во училишниот театар, а наскоро му била доверена и одговорната улога да чита делови од Библијата за време на црковните служби. Иако не успеал да се запише во уметничка школа, работел како курир и извршувал ситни работи за да плати приватни часови по глума.

Првите улоги во филмови како „Јас, Натали“ и „Паника во Нидл“ не биле особено успешни, бидејќи тогаш играл слабаци и губитници. Светска слава стекнал дури на 32-годишна возраст по улогата во „Кум“.

„Еднаш, стоејќи на семафор, ѝ се насмевнав на една девојка од другата страна на улицата. Таа ми викна: О, здраво, Мајкл. Знаете, Мајкл од „Кумот“. Тогаш почувствував дека во тој миг ми го одзеде правото да бидам обичен минувач. Таа ме виде, но не ме виде мене, туку ликот од филмот.“

Џентлмените повеќе сакаат русокоси

Успехот на „Кум“ му донел невидена популарност кај жените. На почетокот од снимањето бил во врска со Џил Клејбург, но таа врска ја нарушила Дајан Китон, која ја запознал на сетот. Сепак, веќе во 1974 година Пачино се свртува кон Марта Келер, која наскоро ќе ја остави поради професорката по глума Џен Терант.

Се чинело дека неговата врела италијанска крв никогаш нема да му дозволи да се смири. Во 1989 година со Терант доби ќерка, но актерот не брзал со брак и парот наскоро се разделил.

Во 1996 година во неговиот живот влегува Беверли Д’Анџело, фатална русокса за која луд бил половина Холивуд. Пачино бил само еден од додворувачите, но по долго настојување Беверли возвратила на чувствата. Подоцна признал дека токму нејзината љубов му помогнала да ја надмине тешката депресија.

„Кога го снимав „Лице со лузна“, ме спаси љубовта. Бев многу вљубен во тој период. Доаѓав дома и со часови ги слушав нејзините приказни за тоа како ѝ поминал денот. Тоа ме спаси, инаку веројатно ќе разнесев сè на парчиња.“

Нивната врска траела цели седум години — што е најдолгата романса во животот на Пачино — и им донела близнаци, Антон и Оливија.

Статусот на вечен ерген во замена за љубов

По раѓањето на децата, кружеле гласини за брак, но Пачино не покажувал намера да ја запроси партнерката. Д’Анџело не сакала засекогаш да остане само девојка на холивудскиот заводник, поради што, не можејќи да ја надмине својата гордост, одлучила да го напушти.

На прашањето „зошто?“, актерот нејасно одговара дека предолго го градел статусот на вечен холивудски неженет за да се откаже од него толку лесно.

Иако продолжил да освојува млади убавици, често истакнува дека ниту една жена не му била толку блиска како Беверли. За жената која го извлекла од депресија зборува со прикриена горчина, признавајќи дека чувствата кон неа сè уште постојат. Се чини дека Пачино денес жали што ја заменил вистинската љубов за аплаузите на милиони обожавателки.

„Може да се каже дека бев оженет, бев во долги и длабоки врски. Неколку пати веројатно згрешив што не се оженив. Особено еднаш, бидејќи тоа навистина го посакував... Во секој случај, јас дефинитивно не сум добар материјал за реклама за брак.“

Последните години Пачино беше во врска со Нур Алфалах, чија листа на поранешни партнери вклучува имиња како Мик Џегер и Клинт Иствуд.

Во 2023 година добиле син, но парот се раздели само три месеци подоцна. Дали поради тоа што не го добила вереничкиот прстен или поради нов маж во нејзиниот живот, Ал Пачино уште еднаш остана доследен на својата титула на најпознатиот холивудски самец.