Кинеските производители имаат голема предност во однос на многу конкуренти – произведуваат електрични (и други) автомобили по многу ниска цена. Како резултат на тоа, цените, дури и со увозни давачки, можат да бидат пониски или еднакви на цените на други електрични автомобили од различни земји, па дури и споредливи со цените на возила со мотори со внатрешно согорување, пишува „Revija HAK“.

Со оглед на брзата глобална експанзија на „BYD“, бренд кој веќе остави трага и во Европа, Јапонците сакале да ја откријат тајната зад ниските производствени трошоци на електричните возила на оваа марка. Јапонското министерство за економија и трговија организирало семинар на кој присуствувале 70 производители на делови, со цел да ги истражат трендовите во електричната мобилност.

„BYD“ ги импресионираше Јапонците

Ѕвезда на семинарот бил моделот „BYD Atto 3“. Тоа е првиот „BYD“ модел лансиран во Јапонија, во јануари 2023 година, со цена од околу 26.800 евра. Покрај него, во анализата биле вклучени и „NIO ET5“ и „Tesla Model 3“. По нивното расклопување, „BYD“ моделите силно ги импресионирале јапонските експерти. Откриле дека главната причина за ниските цени е тоа што компанијата самостојно произведува речиси сите компоненти на автомобилот, а најголемо внимание привлекле батериите.

„BYD“ е втор најголем производител на батерии за електрични автомобили во светот, со удел од 16,4% на глобалниот пазар, а пред него е само кинеската компанија „CATL“ со 37,1%.

„Магичните“ батерии

Јапонските експерти истакнуваат дека токму тоа е клучно за ниската цена на возилата, бидејќи батеријата сама по себе сочинува околу една третина од вкупната вредност на автомобилот. „BYD“ произведува и 8-во-1 погонска оска, која ги обединува предната оска со мотор, конвертор, менувач и други погонски и енергетски системи, како дел од стратегијата за намалување на трошоците. Малата бројка на делови што се користат во секое возило исто така ги изненадила Јапонците.

Кога станува збор за моделот „BYD Dolphin“, од сите негови делови и компоненти, само стаклото (од кинескиот „Fuyao“) и гумите (кои може да се набават од различни добавувачи) не се произведуваат од „BYD“. Сè останато се изработува интерно.

Кај европските и јапонските производители, како „Volkswagen“, „Toyota“, „Renault“, „BMW“ и други, надворешните добавувачи сочинуваат значителен дел од структурата на возилата, што ги зголемува трошоците бидејќи во цената на деловите се вклучени и нивните маржи, заклучува „Revija HAK“.