Илустрации на чудовишта и влијанието на фантазијата

Книгата била забранета од повеќе причини, а една од главните биле експлицитните илустрации. Авторите биле преокупирани со идејата за „неприродни односи на жени со ѕверови“ и во книгата вклучиле неколку дрворези кои наводно прикажуваат потомство настанато од такви врски. Џим Спенсер, проценувач на книги во аукциската куќа „Hansons“, објаснува: „Вклучува дрворези на ‘чудовишта’ за кои се тврдело дека настанале затоа што жените имале односи со животни, на пример со куче“.

Меѓу илустрациите има суштества како маж со бушав кучешки опаш и „чудовиште родено во Равена во 1512 година“. Таквите случаи се припишувале на „валкани и расипани склоности“. „Но, треба да се има предвид дека книгата е напишана во време кога во георгијанска Англија луѓето сè уште ги палеле под обвинение дека се вештерки“, додава Спенсер.

Покрај тоа, во прирачникот се тврди дека мислите на родителите за време на сексуалниот однос влијаат на изгледот на детето. На жените им се советува „внимателно да ги гледаат“ своите сопрузи за децата да личат на нив. Во спротивно, ако им одлетаат мислите, ризикуваат детето да се роди со „големи, дебели усни“. Книгата дури содржи илустрација на „целосно влакнеста девојка и црно доенче“ како примери за наводното влијание на родителската фантазија.

Совети за хармоничен брак

И покрај бизарните идеи, книгата бракот го смета за темел на среќниот живот. „Нема сомнение дека соединувањето на срцата во светиот брак е најсреќната состојба, бидејќи тогаш мажот го добива своето второ јас, личност на која може да ѝ ги довери своите мисли, но и драга сопатничка во своите работи“, се наведува во текстот.

Прирачникот нуди и „совет за двата пола во сексуалниот чин“. „Им советувам, пред да ги започнат брачните прегратки, да ја засилат заемната желба и да ја разгорат страста, на оние нежни начини на кои љубовта може да подучи подобро отколку што јас можам да ги опишам“, пишува авторот. „А кога ќе го направат она што природата го налага, мажот мора да внимава да не се повлече прерано од прегратката на жената“.

Мажот како чудо, жената склона кон пороци

Ставовите за половите изнесени во книгата го одразуваат времето во кое е создадена. Мажот се опишува како „чудо на светот, на кое сè му е подредено“, додека жените се прикажани како суштества склони кон сексуална попустливост.

„Склоностите на девојките кон брак можат да се препознаат по многу знаци, бидејќи кога ќе достигнат пубертет, што е околу 14 или 15 години, започнува нивната месечница. Крвта која повеќе не се користи за растот на нивното тело изобилува и го распалува нивниот ум за телесни уживања“, се наведува во книгата. Се тврди дека на тоа влијаат и надворешни фактори: „Ако јадат тешка, масна храна и зачини, телото дополнително се загрева, па желбата за љубовни прегратки станува многу силна“. Сепак, се додава, кога девиците ќе се омажат и тие желби ќе бидат задоволени „со уживање со сопрузите“, стануваат „поведри и поенергични“.

Исхрана и астрологија за избор на полот на детето

Прирачникот нуди и практични совети за исхрана и астрологија за да им помогне на паровите. На мажите им се препорачува да јадат месо за да се поттикне плодноста. Долгиот список намирници за подобрување на машката сексуална функција вклучува јајца, врапци, еребици, пашканат, млади гулаби, ѓумбир, репка...

Паровите кои сакаат машко дете добиваат совет жената по односот да лежи на десната страна, а за девојче на левата. Астрологијата исто така игра важна улога: „Најпогодното време за зачнување машки деца е кога Сонцето е во Лав, а Месечината во Девица, Шкорпија или Стрелец. За зачнување женско дете најдобро време е кога Месечината е во опаѓање, во Вага или Водолија“.

Труднички желби и брачни грешки

Книгата се осврнува и на „необичните желби“ на трудниците за работи кои не се за јадење, како „јаглен, ѓубре, креда, кожа, коњско месо“. Машкото семе се опишува како „божествен дар богато надарен со витален дух кој му дава облик и форма на ембрионот“.

На крајот прирачникот предупредува и на брачни грешки. Како пример се наведува помлад маж кој, поради богатство, се жени со жена која би можела да му биде баба. „Истото може да се каже и кога вљубен старец ќе ожени млада девица во врвот на нејзината младост и сила, која залудно се обидува да ја задоволи, со што само го забрзува својот пат кон гробот“, се заклучува во книгата, пренесува „Mirror“.