Населба скриена од јавноста

Норт Оукс важи за една од најбогатите адреси во Соединетите Американски Држави, со десетици раскошни имоти чија вредност се проценува од неколку стотици илјади до неколку милиони долари. На пример, неодамна куќа со пет спални соби и седум бањи беше огласена за продажба по цена од речиси 3,5 милиони долари. И покрај тоа, многу жители на Минесота никогаш ни не слушнале за ова место.

„Мистеријата на Норт Оукс започнува штом почнете да учите за него“, изјави за „Daily Mail“ авторот на снимката, креаторот на дигитална содржина Крис Пар. „Постои перцепција дека во Норт Оукс живеат многу директори и раководители на компании од Минесота, но и покрај таа репутација, многу жители воопшто не знаат за него“.

Иако технички не станува збор за затворена заедница, сите патишта во рамките на населбата се во приватна сопственост. Жителите правно го уредиле сопствеништвото така што ги опфаќа и улиците, со што Норт Оукс практично останал без јавни патишта. Влезовите и излезите се надгледуваат со читачи на регистарски таблички и безбедносни камери.

Правна победа против „Google“

Дека сериозно ја сфаќаат својата приватност, жителите покажаа уште во 2008 година. Тогаш градскиот совет на Норт Оукс му се закани со тужба на „Google“ откако открија дека нивното соседство е видливо на услугата „Street View“. Во писмо се заканија со тужба за нарушување на сопственоста доколку фотографиите веднаш не бидат отстранети.

„Google“ на крајот попушти. Претставничката на компанијата Елејн Филаделфо тогаш изјави дека тоа веројатно бил првиот ваков случај во САД. „Многу ретко е цел еден град да побара да биде отстранет“, рече таа.

Мисија за мапирање со дрон

Сепак, Пар забележал правна празнина: градот нема контрола врз воздушниот простор. Откако положил испит и станал лиценциран оператор на дрон, со одобрение од Федералната управа за воздухопловство можел легално да лета над населбата. Како што и самиот наведе, „Норт Оукс не го забранил мапирањето, туку само неовластениот пристап“.

За да ги избегне безбедносните камери, на „Craigslist“ објавил оглас во кој барал некој од жителите да го пушти внатре. Жена под псевдоним Меги Смит се согласила да му овозможи влез во еден од парковите за 10 долари. Оттаму Пар го лансирал дронот и ги снимил сите улици и куќи, остварувајќи ја својата мисија „еднаш засекогаш да ги доврши ‘Google Maps’“, како што се пошегувал во описот на видеото.

Поделени реакции и одбрана на јавниот интерес

Очекувано, жителите не биле задоволни. Претседателот на здружението на сопственици на куќи во Норт Оукс, Ендрју Хокинс, наводно размислува за правни чекори против Пар. Од друга страна, бројни коментатори на Јутјуб го поддржаа неговиот потфат.

„Совршен пример за Стрејсенд ефектот“, напиша еден корисник, алудирајќи на феноменот во кој обидите за криење информации доведуваат до нивно уште поголемо ширење.

Пар објасни дека неговата мисија имала и поширока цел. „Мапите се јавна инфраструктура. Да имаш нецелосна мапа не му користи никому“, изјави тој. Додаде дека ја цени приватноста, но и ја гледа вредноста во можноста светот да се истражува без напуштање на домот. „Фасцинантно е што можеме да видиме улични сцени речиси каде било во земјата и светот“, рече тој.

Интересно, „Google“ ги отстрани снимките на Пар една недела откако ги објави, но тој на тоа одговори со објавување нови снимки.