Поради тоа, во рамки на проектот за негова реставрација е започнат апел за собирање донации, пренесува „BFM TV“.

„Постои итна потреба …“

Како што се наведува, во овој дел од дворецот се забележани пукнатини, ослабени подови и искривени ѕидови, поради што постои опасност од уривање.

Во ова крило, кое од 1539 година било опремено за сместување на приватните апартмани и салите за состаноци на кралот Франсоа Први, поради ваквата состојба ниту еден посетител не може да влезе уште од 2019 година.

„Постои итна потреба брзо да се реагира пред ова крило да се урне“, предупреди генералниот директор на националниот имот Шамбор, Пјер Дибреј.

Споменикот се троши и пропаѓа

Главниот архитект надлежен за историските споменици, Маел де Келен, наведува дека зградата однадвор изгледа во задоволителна состојба, додека во внатрешноста постои „глобален структурен проблем“.

Како што се наведува, овие проблеми не се нови, бидејќи уште во 2003 година посетителите за малку не пропаднале низ таванот на вториот кат.

Историски споменик, како што е овој, со текот на времето се троши и пропаѓа, а постојат различни проблеми – од фасадните ѕидови до рамките – кои создале празнина од околу петнаесет сантиметри меѓу основата и врвот на фасадата.

„Климатските промени исто така ја влошија оваа појава, а поплавите, кои се сè почести и поинтензивни, како што беше случајот во 2016 година, имаат ефект на ’испирање на темелите‘ и нивно слабеење“, објаснува Маел де Келен.

Годишно го посетуваат 1,2 милиони луѓе

За да се решат најитните потреби, со текот на времето на секоја врата биле поставени привремени потпори, но мерките за безбедност станале неопходни за зачувување на интегритетот на дворецот.

Во тек е проект за обнова проценет на 37 милиони евра, а овој бисер на ренесансата секоја година го посетуваат околу 1,2 милиони луѓе.

„Веќе собравме 12 милиони евра за првата фаза на консолидација планирана од 2027 година“, изјави Пјер Дибреј.

Средствата се обезбедени благодарение на грант од Министерството за култура, но и преку апел за донации упатен до посетителите, поставен на влезовите на локалитетот.

Како што наведува Пјер Дибреј, целта на кампањата е подигнување на јавната свест за потребата од интервенции и обновување.

Планирана и втора фаза од проектот

Во рамки на кампањата се собрани речиси 500.000 евра од септември минатата година, а одредба во Законот за финансии од 2026 година има цел дополнително да го поттикне овој процес.

Оваа одредба претставува даночна мерка слична на онаа што беше применета за обновата на Нотр Дам во Париз, со која даночното олеснување за донации за проектот се зголемува на 75 проценти.

„Шамбор е симбол на националното и светското наследство“, изјави Пјер Дибреј, кој е уверен дека „во свет на неизвесност луѓето сакаат повторно да ги откријат корените на својата историја и наследство“.

Планирана е и втора фаза од проектот посветена на реставрација на фасадите и покривите, а доколку сè се одвива според планот, крилото на Франсоа Први повторно ќе биде отворено за посетители во 2032 година.