Дали носењето капа предизвикува ќелавост?

Самото носење капа или друго покривало за глава не предизвикува ќелавост, тврди д-р Манша Сети, дерматолог од здравствената мрежа „St. Luke’s University“ во Пенсилванија. Причината за опаѓањето на косата најчесто е во самиот организам, а губењето на влакната често е само знак дека нешто се случува во телото.

„Носењето капа не се смета за важна причина за опаѓање на косата“, изјави Сети. „Единствено советуваме да се избегнуваат капи кои се премногу тесни или премногу го притискаат скалпот.“

Косата поминува низ три фази на раст и нормално е секој ден да изгубиме од 50 до 100 влакна. Но различни здравствени фактори можат да го нарушат тој процес и да го забават или запрат нормалниот раст на косата.

Постојат повеќе можни причини за губење коса

Причината може да биде наследна, како кај андрогенетската алопеција. Меѓу другите можни причини се нарушувања во работата на тироидната жлезда, породување, операција, како и недостаток на витамини или минерали, поради што косата може да влезе во фаза на мирување и да престане нормално да расте. Губењето коса може да биде и нуспојава од одредени терапии, на пример хемотерапија. Автоимуни заболувања, како алопеција ареата, исто така можат да предизвикаат проретчување на косата бидејќи имунолошкиот систем ги напаѓа фоликулите на влакната.

„Генетиката игра голема улога, особено кога станува збор за тоа кога ќе започне губењето на косата и како ќе изгледа“, вели Сети. „Влијаат и гените од мајчината и од татковата страна. Осетливоста на фоликулите на влакната на хормонот дихидротестостерон, односно DHT, одредува на кои делови од скалпот косата ќе се проретчи. Кај повеќето мажи тоа се предниот и горниот дел од главата. Бидејќи DHT настанува од тестостерон, високото ниво на тестостерон може дополнително да го влоши губењето на косата.“

Таа додава дека опаѓањето на косата можат да го поттикнат и ниското ниво на железо, витамин D и протеини, болести на тироидната жлезда, нагло слабеење, на пример при користење лекови како „Ozempic“, тешка болест и долготраен стрес. Губењето коса може да биде и последица на инфекција. Габична инфекција на скалпот, тинеа капитис, може да предизвика осип и да го спречи растот на косата на погодените делови од кожата.

Може ли губењето на косата да се запре?

„Може, ако проблемот не е премногу напреднат и ако не се појавиле лузни на фоликулите на влакната“, вели Сети. „Губењето на косата најдобро се лекува во рана фаза.“

Дали опаѓањето може да се запре најмногу зависи од причината. Понекогаш косата сама се обновува, особено ако проблемот е поврзан со стрес или хормонална нерамнотежа. Кај жените по породување, опаѓањето на косата поврзано со бременоста обично се смирува во рок од неколку месеци. Затоа е важно да се разговара со лекар кој може да помогне да се открие што стои зад проблемот.

„Првиот чекор е да се открие причината за губењето на косата за да се знае што точно треба да се лекува“, изјави Сети. „Постојано ми излегуваат реклами за разни решенија против опаѓање на косата, а некои звучат премногу добро за да бидат вистинити, затоа е важно да се истражи, да се разговара со стручно лице и да не се трошат пари на производи што не помагаат.“

За наследно опаѓање на косата достапни се миноксидил, лекови што се нанесуваат на скалпот или се земаат орално, додатоци во исхраната или трансплантација на коса, но важно е да се знае дека и овие третмани можат да имаат нуспојави. Одредени додатоци, како сабал палма, ашваганда и масло од семки од тиква, исто така можат да помогнат, додава таа.

Пената со 5 проценти миноксидил е една од најчесто препорачуваните опции што може да се купи без рецепт и често е добар почеток, вели Сети. „Клучно е најпрво да разговарате со дерматолог за да не дојде до несакани реакции со други лекови што можеби ги користите“, нагласи таа.

Таквите решенија можат да бидат и скапи. Трансплантацијата на коса обично чини меѓу 5.000 и 15.000 долари, во зависност од бројот на потребни пресадоци, а во цената влегуваат и дополнителни консултации и корекции. Лекови како финастерид или миноксидил често не се покриени од осигурување, што дополнително го зголемува трошокот за долготрајна употреба.

Губењето на косата не мора да биде лоша работа

Нема ништо лошо во тоа да сте ќелави. Напротив, во последните години се појави тренд познат како „baldmaxxing“, кој ги поттикнува луѓето да го прифатат губењето на косата наместо постојано да се обидуваат да го скријат.

Околу тоа се создаде и цела заедница на луѓе. Тие не зборуваат само за физичката страна на ќелавоста, туку и за психолошкиот дел од целиот процес, си помагаат меѓусебно полесно да го прифатат и гледаат на ќелавоста како на нешто што не треба да се крие, туку да се носи со самодоверба.