Според британските истражувачи, лицата кои се придржувале до целосно непреработена исхрана, со акцент на овошје и зеленчук, во просек внесувале 330 калории помалку дневно. Ова било и покрај фактот што дневно консумирале околу 57 проценти повеќе храна отколку оние кои јаделе своја вообичаена исхрана, која вклучувала покалорични намирници како стек, тестенини и павлака.

Утврдено е и дека исхраната базирана на целосни намирници може да помогне во намалување на желбата за храна. Научниците порачаа дека нивните резултати покажуваат оти одредени видови ултрапреработена храна треба да се ограничат и дека луѓето, кога имаат можност да избираат непреработена храна, носат попаметни одлуки.

Нутритивниот состав на храната

Професорот Џеф Брунстром, водечки автор на студијата и професор по експериментална психологија на Универзитетот во Бристол, изјави:

„Прејадувањето не е нужно основниот проблем. Нашето истражување јасно покажа дека потрошувачите на исхрана базирана на целосни намирници всушност јаделе значително повеќе отколку оние на исхрана со преработена храна. Но, нутритивниот состав на храната влијае врз изборите. Се чини дека ултрапреработената храна ги поттикнува луѓето да избираат покалорични опции, кои дури и во многу помали количини лесно доведуваат до вишок енергија и со тоа поттикнуваат дебелина.“

Тој додаде:

„Возбудливо е да се види дека, кога на луѓето им се нудат непреработени опции, тие интуитивно избираат храна што ги балансира уживањето, нутритивната вредност и чувството на ситост, а притоа го намалуваат вкупниот енергетски внес. Нашите прехранбени избори не се случајни. Всушност, се чини дека носиме многу попаметни одлуки отколку што се претпоставуваше порано, кога намирниците се претставени во нивната природна форма.“

Ултрапреработената храна богата со адитиви, како чипс и слатки, со децении е на лош глас поради наводни здравствени ризици. Стручњаците дури повикаа на драстично намалување на ултрапреработената храна, која најчесто се дефинира како јадлива храна со повеќе вештачки отколку природни состојки, во секојдневната исхрана, пишува „The Sun“.

Во студијата, научниците следеле 20 лица со прекумерна телесна тежина, десет мажи и десет жени, со просечна возраст од 31 година, кои биле поделени во две групи. На едната половина ѝ било кажано две недели да се придржува до исхрана со минимално преработени намирници, како салати и немасно месо, додека другата половина добивала храна како готови оброци и виршли.

По завршувањето на едната диета, групите ги замениле режимите. Истражувачите ги усогласиле главните оброци според уделот на масти, заситени масти, протеини, јаглехидрати, сол и влакна.

И покрај тоа, учесниците на исхрана со целосни намирници и понатаму јаделе повеќе храна дневно, но внесувале помалку калории, што резултирало со губење на речиси еден килограм телесна маса. Во трудот објавен во списанието „The American Journal of Clinical Nutrition“, истражувачите не можеле точно да објаснат зошто луѓето јаделе повеќе на непреработена исхрана.

Сепак, изнеле претпоставка:

„Консумацијата на зеленчук и овошје веројатно имала важна улога во тоа што овие оброци имале релативно ниска енергетска густина.“ Поради тоа што била пониска, волонтерите можеле да изедат повеќе храна.

Коавторот на студијата Марк Шацкер, автор на книгите "The Dorito Effect" и "The End of Craving", додаде:

„Доколку учесниците јадеа исклучиво калорична храна, нашите резултати ќе покажаа дека би им недостигале неколку клучни витамини и минерали и со текот на времето би развиле недостаток на микронутриенти. Тие недостатоци беа надоместени со нискокалорично овошје и зеленчук.“

Внес на овошје и зеленчук

Професорот Џулс Грифин, директор на Институтот Ровет при Универзитетот во Абердин, кој не учествувал во истражувањето, исто така изјави:

„Големото прашање е што ја поттикнува оваа мотивација за поголем внес на овошје и зеленчук при непреработена исхрана.

Авторите сугерираат дека тоа би можело да биде поврзано со изворите на хранливи материи и енергијата што доаѓа заедно со нив, на пример ултрапреработени житарки кои се збогатени, но можат да содржат многу шеќер.

Сепак, постојат и алтернативни објаснувања зошто непреработените оброци биле поздрави. Тие обезбедувале повеќе влакна во природна форма, а знаеме дека тоа има поволен ефект врз цревата и нè држи подолго сити, делумно и поради ослободувањето на хормонот GLP1.“

Обединетото Кралство најлошо стои во Европа по консумација на ултрапреработена храна, која сочинува проценети 57 проценти од вкупната исхрана на населението. Експертите препорачуваат околу 80 проценти од исхраната да ја сочинуваат целосни или минимално преработени намирници, свежо месо, овошје, зеленчук, сирења, јаткасти плодови, цели житарки и мешунки.