Намирниците богати со квалитетни протеини, витамин Д, витамин Б12 и калциум имаат важна улога во зачувувањето на мускулната маса и густината на коските. Токму на оваа тема интересни резултати донесе долгорочно кинеско истражување за здраво и долговечно стареење, кое опфатило повеќе од 5.000 испитаници постари од 80 години, пишува „Nova.rs“.

Податоците собирани од 1998 до 2018 година покажале дека лицата кои не консумирале месо имале помала веројатност да доживеат 100 години во споредба со оние кои јаделе месо. Истражувачите ги анализирале прехранбените навики на учесниците во текот на две децении и ги споредувале со нивната долговечност.

Со стареењето доаѓа до намалување на потрошувачката на енергија, пад на апетитот…

Иако вегетаријанските диети порано биле поврзувани со помал ризик од срцеви заболувања и дебелина, ова истражување сугерира дека производите од животинско потекло можат да имаат значајна улога во зачувувањето на здравјето во подоцнежните години.

Овошјето и зеленчукот обезбедуваат влакна, антиоксиданси и низа важни микронутриенти, но внесот на одредени витамини од Б групата, особено витамин Б12, може да биде предизвик кај строго веганската исхрана. А како што истакнуваат експертите, потребите на организмот во осмата и деветтата деценија од животот значително се разликуваат од потребите на помладите лица.

Со стареењето доаѓа до намалување на потрошувачката на енергија, пад на апетитот, губење на мускулната маса и намалување на густината на коските. Сето тоа го зголемува ризикот од потхранетост и слабеење на организмот. Поради тоа, соодветниот внес на протеини во повозрасната доба е особено важен.

Податоците од кинеската студија укажуваат дека постарите лица кои не јадат месо, особено ако се потхранети, можат да бидат изложени на поголем ризик од здравствени компликации кои влијаат врз долговечноста.

Потребите во исхраната се менуваат со годините

Интересно е што помалата веројатност за доживување 100 години е забележана првенствено кај испитаниците кои биле слаби, додека кај постарите лица со здрава телесна тежина консумирањето месо не покажало значајна разлика.

Потхранетоста и кревкоста во подоцнежната возраст и претходно биле поврзувани со зголемен ризик од прерана смрт, па телесната тежина може да биде клучен фактор во толкувањето на овие резултати.

Важно е да се спомене и дека учесниците кои не јаделе месо, но консумирале млечни производи, риба или јајца, имале слични шанси да ја доживеат стотата година како и оние кои јаделе месо. Истражувачите заклучиле дека умерени количини намирници од животинско потекло можат да помогнат во спречување на потхранетост и зачувување на мускулната маса во подоцнежната возраст, особено во споредба со строго веганската исхрана.

Заклучокот на студијата не е дека месото е единствениот пат до долговечност, туку дека потребите во исхраната се менуваат со годините и дека постариот организам бара внимателно планиран внес на нутриенти за да се намали ризикот од слабост, скршеници и општо нарушување на здравјето.