Организациите за човекови права објавија фотографија од Иранецот кој утре ќе биде обесен: „Водел војна против Бога“

Организациите за човекови права наведуваат дека Ерфан Солтани, на возраст од 26 години, бил уапсен минатата недела за време на протестите во градот Караџ, во близина на иранската престолнина Техеран. Според нивните наводи, тој треба да биде обесен во среда, а притоа не му било овозможено соодветно судење.

„На неговото семејство му е кажано дека е осуден на смрт и дека казната ќе биде извршена на 14 јануари“, соопшти норвешката организација „Iran Human Rights“ (IHR), повикувајќи се на сопствени извори. „IHR“ наведува дека за време на протестите е потврдена смртта на 648 лица, меѓу кои и девет малолетници, со предупредување дека вистинскиот број може да биде значително поголем. Блокирањето на интернетот, како што истакнуваат, ја отежнува проверката на овие податоци, а се проценува дека околу 10.000 луѓе се уапсени.

Директорот на „IHR“, Махмуд Амири-Могадам, изјави дека „распространетото убивање на цивилни демонстранти во последните денови од страна на Исламската Република“ е потсетник на злосторствата од 1980-тите, кои ги опишува како злосторства против човештвото. Тој порача дека „меѓународната заедница има должност да ги заштити цивилните демонстранти од масовно убивање од страна на Исламската Република“.

Уште една организација, „National Union for Democracy in Iran“ (NUFD), побара меѓународна поддршка со цел да се запре погубувањето на Солтани. Во нивниот апел објавен на платформата X се наведува дека „неговиот единствен злостор е викањето за слобода за Иран. Биди негов глас“.

Според наводите објавени во медиумите, Солтани бил уапсен во саботата за време на протестите во Караџ и обвинет за „водење војна против Бога“, дело кое во Иран се казнува со смртна казна. „NUFD“ тврди дека му бил ускратен пристап до адвокат.

Извештаите наведуваат и дека наводното погубување на Солтани сè уште не можело независно да се потврди поради прекините во комуникациите и ограничениот пристап до информации во Иран, додека властите настојуваат да го задушат бранoт протести против теократскиот режим на врховниот водач, ајатолахот Али Хамнеи.

Во исто време, иранските власти се обидуваат да демонстрираат контрола на улиците преку организирање масовни собири на поддржувачи. За време на една таква манифестација во понеделникот, Хамнеи ги нарече масовните митинзи доказ дека протестното движење е поразено и оцени дека тие се „предупредување“ за Соединетите Американски Држави.