Со два нови закони, германската влада сака да поттикне повеќе луѓе да штедат преку пазарот на капитал: прво, преку реформата на пензијата Ристер и воведувањето на посебна пензиска инвестициска сметка („Altersvorsorgedepot“), а второ, преку раната старт-пензија, која треба да ги охрабри родителите што порано да почнат да штедат за своите деца.
Министерот за финансии Ларс Клингбајл (SPD) минатата недела го претстави првиот нацрт-закон за пензинската инвестициска сметка. Во понеделникот беа објавени и клучните елементи за раната старт-пензија.
Во документот, владата скицира дека од 2026 година секое шестгодишно дете би можело да добие сопствена сметка на која државата ќе уплаќа по 10 евра месечно — сè додека детето не наполни 18 години.
Вкупно, државата му подарува речиси 1500 евра на секое дете. Родителите или бабите и дедовците можат дополнително да уплаќаат свои сопствени пари.
Пари за пензија или стартен капитал на 18 години?
Родителите можат да изберат на која „јуниор сметка“ ќе се вложуваат државните пари. Ако не одлучат сами да отворат сметка, парите ќе одат во државно управуван фонд. Бундесбанката ќе ги инвестира тие средства и редовно ќе објавува информации за приносите. Така, родителите и децата подоцна ќе можат да го следат развојот на заштедениот капитал. Родителите во секое време може да одлучат да отворат сопствена сметка за детето и да ги префрлат дотогаш уплатените пари.
Кога детето ќе стане полнолетно, само одлучува што ќе прави понатаму со средствата: една од можностите е префрлање во сопствена пензиска инвестициска сметка и продолжување со штедењето до пензионирање. Децата чии родители не отвориле јуниор сметка ќе ги добијат парите директно од Бундесбанк. Во документот не е јасно наведено дали е можност делумна или целосна исплата, ниту дали ќе биде задолжително парите да се користат исклучиво за пензиско штедење.
Поддршка за деца родени од 2020 година
Право на поддршка ќе имаат сите деца родени во 2020 година и подоцна; постарите нема да ја добијат оваа можност. Освен тоа, парите ќе можат да ги добијат само деца кои живеат во Германија. Во фазата на штедење приносите од раната старт-пензија ќе бидат ослободени од данок — исто како и кај пензиската инвестициска сметка.
Владата сака раната старт-пензија да се обработува и во училиштата, за децата да ги научат основните правила на штедењето.
На прв поглед, 1500 евра низ дванаесет години не звучат многу. Но, на крајот од штедењето, износот треба значително да биде поголем. Просечниот годишен принос од инвестиции на капиталниот пазар изнесува околу седум проценти. Поради сложениот камата-на-камата ефект, по дванаесет години сумата расте на повеќе од 2200 евра — и тоа само со државните уплати. Ако родителите или членовите на семејството дополнително уплаќаат, износот се зголемува.
Планиран старт во 2027 година
Раната старт-пензија треба да стапи на сила истовремено со реформата на пензијата Ристер. Во документот се наведува дека целта е законот да започне да важи на 1 јануари 2027 година. Децата родени во 2020 година би ги добиле уплатите за 2026 година ретроактивно.
