Но она што ја прави оваа вест навистина посебна е нешто многу подлабоко: „Со ДНК има две песни, коишто ги снимивме пред да загинат“, откри Врчак. Тие две композиции, снимени во моменти кога никој не можел ни да претпостави каква трагедија ќе следи, стануваат срцевина на албумот - спомен, почит и музички печат за пријателите со кои ги делеше сцената и животот.

Албумот ќе носи околу десет нови песни, а по голема желба на фановите, ќе добие и свое второ поглавје - „best of“ издание, што ќе ги собере неговите најголеми хитови низ годините.

За љубителите на македонската музика, името Врчак е повеќе од артист. Тој е генерациска приказна. Човек кој кон крајот на 90-тите влезе на сцената со свој препознатлив звук и брзо стана еден од највлијателните хип-хоп автори. Неговите песни „И повторно сам“, „Пред да заспијам“, „Во твоето срце“, „Манастирски сон“ и многу други останаа врежани во времето - дел од саундтракот на цела една младост.

По долг период на повлекување од јавноста, секое негово појавување повторно будеше надеж кај фановите: ќе има ли нов албум, ќе се врати ли Врчак со звукот што одбележа едно време?

И еве, тој момент дојде.

„Баш е супер албумот и едвај чекам да се заврши“

Со неговиот препознатлив ентузијазам, Врчак откри дека работата оди во одлична насока, дека има уште многу соработки и дека ова е музика создадена од чисто чувство - токму она што фановите отсекогаш го ценеле кај него.

Новиот албум не е само враќање. Тој е мост меѓу едно минато полнo со хитови и сегашност која копнее по искрен, човечки, македонски звук.

Автор: Ц.Н.