Најтрофејниот олимписки спортист во историјата, Мајкл Фелпс, денес има 40 години и ужива далеку од базените во кои ја изгради својата легенда, носејќи дома неверојатни 28 олимписки медали — од кои 23 златни. Денес изгледа поинаку од времето на својата најголема слава: кратката фризура ја замени со долга коса врзана во репче, а мазното, избричено лице од натпреварувачките денови сега го покрива густа брада.
Фелпс е роден во 1985 година, а веќе во 2000 година настапи на своите први Олимписки игри. Иако тогаш не освои медал, имаше само 15 години — Игрите во Сиднеј беа само најава за ерата на доминација што ќе следи и ќе го вброи меѓу најдобрите спортисти во историјата.
Доминацијата започна во Атина
На Олимписките игри во Атина во 2004 година започнува неговото време. Освои вкупно осум медали, од кои шест златни — успех што го најави како нова суперѕвезда на светското пливање. Тоа беше само почеток. Четири години подоцна, на Игрите во Пекинг, неговата доминација стана апсолутна: повторно освои осум медали — но овој пат, сите беа златни.
Четири години по Пекинг, на Олимписките игри во Лондон во 2012 година, додаде уште шест медали — четири златни и две сребрени. На крај, во 2016 година во Рио де Жанеиро, повторно блесна со уште шест медали и го заокружи своето олимписко наследство со вкупно 28 медали: 23 златни, 3 сребрени и 2 бронзени.
Нов живот надвор од базенот
По завршувањето на кариерата, Фелпс се посвети на други предизвици — рекреативно се натпреварува во голф и покер. Со својата сопруга Никол Џонсон, поранешна „Miss California“ од 2010 година, има четири синови.
Денес, далеку од осветлените олимписки базени, Мајкл Фелпс живее мирен живот, но неговата сенка и понатаму лебди над спортот — како симбол на упорност, дисциплина и невозможен успех што никој досега не го повторил.
