„Не го убивајте, не го газете, не го сечете“, е драматичното предупредување што го упати Сид Милер, тексашкиот комесар за земјоделство, преку телевизијата „NBC“. Причината? Северниот дел на Тексас го зафатила инвазија на токсичен црв познат како „црв со глава на чекан“ – суштество со бизарна биологија што целосно ги поништува класичните методи за уништување на штетници.

По неколку недели со обилни дождови, кои експертите ги поврзуваат со климатските промени, влажната и топла почва станала идеално живеалиште за овој инвазивен вид. Жителите на Далас и Форт Ворт масовно пријавуваат дека ги среќаваат овие суштества во своите дворови, градини и приоди – сцени кои, според нив, изгледаат како од хорор-филм, пренесува „Science Alert“.

„Демонските црви“ излегуваат од земјата

Адам Ингл, жител на Келер, доживеал шок кога на својата тераса забележал црв долг повеќе од 30 сантиметри – најголем што некогаш го видел. „А потоа сфатив дека му главата има облик на чекан“, раскажал Ингл.

„Беше застрашувачки, како да дојде крајот на светот — дури и црвите станаа демонски.“

Црвот со глава на чекан (Bipalium kewense) е лесно препознатлив. Неговото кафеаво-црно пругасто, сплескано тело може да достигне должина до 40 сантиметри, но највпечатлива му е главата во форма на полумесечина или чекан. Иако овој вид потекнува од југоисточна Азија и е присутен во САД уште од доцните 1800-ти години, последните временски услови довеле до експлозија на нејзината популација.

Најголемиот проблем лежи во неверојатната способност на овие црви за регенерација. Токму затоа класичните методи на уништување не само што се неефикасни, туку се и контрапродуктивни.

„Она што луѓето мора да го знаат е дека не смеат да го убиваат, газат или сечат, бидејќи од еден црв може да настанат три или четири нови. Тоа е бесполово размножување“, објасни комесарот Милер.

Пресечете го на половина – ќе добиете два црва

Дури и ако му ја отсечете главата, од телото повторно ќе израсне нова единка. Секој дел од телото има способност да се регенерира во целосен нов организам. Токму оваа биолошка особеност ги прави овие суштества речиси неуништиви.

Покрај тоа што е невозможно да се уништи, црвот со глава на чекан претставува двојна закана.

Како инвазивен вид, во САД нема природни предатори. Се храни со полжави, но уште поважно – со дождовни црви. Токму дождовните црви се клучни за здравјето на почвата, бидејќи ја проветруваат и создаваат хумус.

Нивното неконтролирано ширење може да доведе до масовно намалување на популацијата на дождовни црви, што би имало сериозни долгорочни последици за земјоделството и локалните екосистеми.

Овие црви произведуваат невротоксин наречен тетродотоксин – истиот отров што се наоѓа кај смртоносната риба „pufferfish“. Иако не касаат и не боцкаат, токсинот го користат за да го парализираат својот плен. Кај луѓето, контакт со гола кожа може да предизвика иритација и исип.

Особено се опасни за домашните миленици ако ги изедат, поради што експертите предупредуваат да не се ракува со нив без заштитни ракавици.

Како безбедно да се ослободите од нив

Властите издадоа детални упатства за безбедно отстранување на овие натрапници:

1. Не ги допирајте со голи раце. Користете ракавици или некаков алат, како лопатка.

2. Замрзнете ги. Ставете го црвот во херметички затворена кеса и држете го во замрзнувач најмалку 48 часа, потоа може да го фрлите.

3. Користете сол или оцет. Алтернативно, потопете го во смеса од сол и оцет – ова ефикасно ќе го уништи.

4. Пријавете го наодот. Властите ги повикуваат граѓаните секое појавување да го пријават на „Texas Invasive Species Institute“ за подобро следење на нивното ширење.

Како што летото продолжува, а влажноста останува висока, се очекува овие појави да станат сè почести. За жители како Адам Ингл, кој има куче, мало дете и градина, оваа инвазија претставува вистинска лична закана.

„Ова суштество мрази сè живо“, изјави тој со загриженост.

Жителите на Тексас се повикани на претпазливост, свесни дека се соочуваат со непријател кој станува посилен со секој погрешен обид да биде уништен.